Shillong, May 12: Meghalaya a•doko COVID-19-ko man•giparang batroroengahani gimin a•dok sorkari, a•doko songdongenggipa mande sakantikon Rapid Antigen Test (RAT)-chi porikka ra•e nina tik ka•angaha.
“Meghalaya a•doko songdongenggipa mande sakantikon chinga Rapid Antigen Test ka•na gita tik ka•aha aro chinga knalonin porikka ra•e nianiko a•bachengatnaba gnang,” ine a•dokni Deputy Chief Minister parakataha.
Tynsong-ni parakatani gitade, kenchakna nangbatenggipa adita biaprangko seokenba, mande sakantikon porikka ra•e nianggen.
Meghalaya a•dokni CHC, PHC aro sub centre-rangko namdapatna nangenga ine janapatengon, RAT-chi porikka ra•anian altubatgipa chol ong•ani gimin porikka ra•e nianio ASHA aro Anganwadi worker-rangkoba kamo donatgen ineba Deputy CM parakataha.
Manderangko porikka ra•e nianio songni nokni dilgiparangko bakrimchina gitaba sorkari mol•molanggen ine Tynsong aganaha.
East Khasi Hills a•jaon COVID-19-ko man•giparang bilongbatengani gimin lockdown-ko ra•dodapangkugenma ine sing•on, obostarangko niroke sorkari ja•kuko de•anggen ine Deputy Chief Minister parakataha.
Chu•gimik lockdown-ko ra•gatna nanganiona manderangko tarie dongchina gitaba Tynsong didiataha.
Meghalaya sorkari aro hospital-rango rake kamrangko ka•engoba a•doko mande sianirang batroroengaha ineba Tynsong parakataha.
COVID-19-ko warachakanio sorkari aro health department-ni dongimin niamrangko ja•rikchina gitaba ua a•doko songdongenggipa manderangko didiataha.
