Bajengdoba, Feb 9: Re•anggipa February 5 tarikoni 8 tarikona, A•chik Baptist Krima No. XVII-ni ning•o donggipa Moamari Baptist Mondolio sokachakgipa A•chik Baptist Dal•gipa Krima (ABDK)-ni chang 152-gipa Soba ba tom•bimongani, Robibar attamo nambee matchotangaha.
Ia chang 152-gipa ABDK sobana donsogimin theme ba pangchakania ‘Gisik Srongao Re•ruraani’ ine ong•a aro Text ba Sastroni bakara Titus 2:11-12 ong•a. Ia sastroni bak aro donsogimin pangchakanion dingtang dingtang skigiparang, ia ABDK tom•bimonganio salantian Isolni namgipa kattarangko aganprakangaha.
Bilsiantian ia ABDK Sobao Garo Hills, Assam aro Khasi Hills-ni dingtang dingtang biaprango donggipa Krimarangoni A•chik Baptist bebera•giparang tom•chimongbae apsan Isolko olakkirimtoka aro apsan daken ia changoba dingtang dingtang biaprangoni bebera•giparang apsan Isolko olakkirimna gita Moamari songo tom•chimongtokeaha.
Ia tom•bimonganiko a•bachengataonin salantian dingtang dingtang dilgiparangni jakchi Isolni namgipa kattarangko aganprakangaha aro tom•bimonganirango dingtang dingtang mondolini choir-rangba knatobegipa gitrangchi Nokgipa Isolna ring•mittelan baksana Isolni namgipa kattarangko ring•achi aganprakangaha.
Ia ABDK sobani bon•kamgipa sal, chong•motan Robibar salni olakkianiko Harding Theological College-ni skigipa John Stellon Ch Marak, Isolo bi•anichi a•bachengataha aro Isolni namgipa kattarangko, Council of Baptist Churches in North East India (CBCNEI)-ni Secretary General Rev Dr Namseng R Marak aganangskaaha.
Robibar salni jinma olakkianio, sokachakgipa Krimani Choir, HTC Choir, GBC Choir aro Samuel G Momin, knatobee Isolna ring•mittelanirangchi ia tom•bimonganiko mikkim gnangbatataha.
Robibar salni tom•bimonganio, Meghalaya a•dokni Chief Minister Conrad K Sangma, Opposition dolni dilgipa Mukul Sangma, Tura-ni MP Saleng A Sangma, Meghalaya Legislative Assembly-ni Speaker Thomas A Sangma, dingtang dingtang MLA-rang aro gipin dilgiparangba dongpae bak ra•angaha.
Robibar salo, ia ABDK sobaona re•anggipa manderang ia chang namen bang•bataha aro uandaken ramarango gari gorarangni apchangket ong•anirangkoba nikna man•aha.
Garo Hills-ni dingtang dingtang biaprangoni bang•bea manderang, Robibar pringnian ABDK sobaona re•chakatangtokaha indiba gari salgiparang, skatang salani a•sel aro gari bolsa bolgipinko salbadena jotton ka•ani a•sel ramarango garirang apchangketenba bang•a manderangan somoi gita tom•bimonganiona sokangna man•tokjaha ine kobor on•aha.
Na·simang iakoba nina man·gen:
Na·simang iakoba poraina man·gen: 8isone Festival-o Umiam chi-oniko man·gipa kg 100 galgimin ja·koprangko Salgro Salaram-ni map dake taria
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
