Shillong, Dec 9: Mowkaiaw-o skul nok te•gniko rikna gita Sukrobar salo Mowkaiaw constituency-ni MLA Nujorki Sungoh, pangchakaniko songe on•angaha aro ia skul nokrangna pangchakaniko songe on•angani somoio ua jinmana aganprakatengon, Mowkaiaw songna ua gong crore 10-ni namdapanirangko ra•bana man•aha ine parakataha.
Mowkaiaw MLA-ni parakatani gitade, ia gong crore 10-oni crore 5-de Mowkaiaw-o rama tarina, gong crore 4-mangkode 1939 bilsio kuligipa Mowkaiaw Govt LP School aro 1957 bilsio kuligipa Mowkaiaw Govt UP School nokrangko rikna chamanian ong•enga. Mowkaiaw Govt LP skul nokko rikna gita gong lak 44-ko aro Mowkaiaw Govt UP skul nokko rikna gita gong crore 3-ko hisape donaha ineba Sungoh parakataha.
Assam a•dokni simarango donggipa songni manderangna naljokaniko on•na gita ua Barato-o police outpost-ko ia jani 13 tarikon kulie on•anggnok ineba Sungoh, ia tom•anio jinmana parakataha.
