Shillong, June 27: Tura centre-ni Meghalaya Teachers Eligibility Test (MTET)-ko pass ka·gimin skigiparangna bangbang ong·e dongenggipa dingtang dingtang sorkari lower primary (LP) skulrango skigipani kamrangko gapatna man·na gita interview-ko ra·china a·dok sorkariko didiataha.
Skigiparangni parakatani gitade, adita salrangna skang ong·atanggipa interview-o Garo Hills-ni gipin a·jarangode interview-o mikkangpagipa pilak candidate-rangkon kamna ra·tokahachim indiba Tura division-ode, kamna u·iatgipa ge 114 kamrangna MTET-ko pass ka·gipa sak 159 candidate-rangoni sak 96-kosan ra·aiahachim.
Gipin a·jarango MTET-ko pass ka·gipa skigiparang chu·ongjaengani a·sel bang·a skulrangkon chipe donna nangengoba Tura centre-ni MTET pass ka·gimin skigiparangkode gipin a·jarango ba division-rango dosgastorangko galna on·jaenga ineba Tura centre-oni MTET pass ka·gimin skigiparang parakataha.
Sorkarini on·gipa advertisement ba u·iataniode, MTET pass ka·gimin skigiparangko a·dokni gipin division ba a·jarango dorgasto galna man·jawa ine maming janapani dongjachim ine talatangengon, MTET-ni miksonganian ‘Meghalaya Teachers Eligibility Test’-sa ong·ani gimin ku·tangni subject-rangna agrede Meghalaya a·dok gimikon choligipa ong·na nangaiachim ine Tura centre-ni skigiparang parakataha.
Tura centre-oni MTET-ko pass ka·gipa candidate-rangde gipin a·jarango ba division-rango Non-Govt LP skulrangoba cholrangko man·jaenga ineba skigiparang, suk ong·gijaniko parakataha.
“Gipin a·ja ba division-rangode MTET pass ka·gijagipa skigiparangkoba Non-Govt LP skulrango skigipani kamna ra·engani gimin ian Education department-ni on·gimin ge·etaniko pe·ani gita ong·enga,” ine Tura centre-ni MTET pass ka·gimin skigiparang parakataha.
National Council for Teachers Education (NCTE) Act, Right To Education (RTE) Act 2009 aro gipin niamrango pangchake kamko ka·na kragipa aro 2011 bilsi dipetan Govt LP skulrango skienggiparang bang·en MTET-ko pass ka·e dongenggiparang dongachim ine janapatengon, skulrango poraienggipa chatro chatrirangni namgnina, Tura centre-o MTET-ko pass ka·e dongenggipa skigiparangnaba cholko on·na gita bangbang ong·e dongenggipa skigipani kamrangna interview-ko ong·atchina skigiparang, a·dok sorkari aro Education department-ko didiataha.
