Mumbai, July 18: Mija Sonibar waloni Robibar pringona kingking adita kontarangna mikkarang tipchanggija jimbee waangani a·sel Mumbai-ni Chembur aro Vikhroli biap jolrango a·arang ruronge nokrang be·dapa man·e komibeoba sak 20 manderang siaha.
Songjinmani municipal dol, BMC-ni u·iatani gitade, Vikhroli jolo donggipa ge·sa manderangni dongchakenggipa nok Robibar pringo be·gruaha aro a·selo sakgittam manderang siaha.
Unbaksana, Chembur-ni Bharat Nagar biap joloniko sak-chi·bonga manderangko naljokataha aro Vikroli-ni Surya Nagar-oni sak-skuko naljokataha ine u·iatan baksana, saknagiparangko sambajolni sanram biapona rimangaha ineba officialrang u·iatdapaha.
Ia biap damgnio a·sel ong·anio bang·a manderang dapako man·ahani gimino sandiatanirangko dontonggijan dakatengkua, ineba official parakataha.
Unomiting, ia obosta ong·anio manderangni janggirang gimaahani gimin a·songni Prime Minister Pa Narendra Modi an·tangni suk ong·gijaniko parakatengon, sianggiparangni nokdangrangna gong lak 2 ka·e gimaanina on·pilskana gita agan-parakatan baksa a·selo mata-bu·a man·e saknagiparangnaba gong hajal 50,000 ka·e on·pilskana gita uni office-oni Twitter-o seachi parakatjolaha.
Unbaksana, a·dokni skotong minister Pa Uddhav Thackeray-ni office-oniba a·sel ong·ao sianggiparangni nokdangrangna gong lak 5 ka·e on·na gita parakaraha.
Toe niao, 176.96 mm-rang ong·pile Sonibar attam 8 bajioni pringgipin 8 bajiona kingkingan Mumbai songjinmao mikkarang jimbee waangaha, ine officialrang parakataha.
Iachi, Chunabhatti, Sion, Dadar aro Gandhi Market, Chembur aro Kurla LBS Road ia biaprango chirangba namen dal·aha.
Indake ong·engon, re·baenggipa sal-bongarangna kingingan Mumbai songjinmao mikkarang jime waangkugnikoba India Meteorological Department (IMD)oni u·iatsoaha.
