SHILLONG, MAY 5: A∙dokni muster roll aro daily wage worker-rangna Variable Dearness Allowance-ko bariatna ru∙uta somoirangoni dabianirangko dakengon, Skotong Minister Conrad K Sangma-ni uarangko knachake chu∙sokatahanina Meghalaya Muster Roll Workers Union-ni Joint Action Committee Sombar salo uko mitele aganangaha.
Uandake, May 1 tarik, chong∙motan May Day-o, skotong minister ia parakataniko dakenba, ru∙uta salrangoni nangnike dabienggipako kamchi aganchake on∙aha ine JAC-na ku∙pattitimgipa Khroo L Pariat aganangaha.
May 11 tariko a∙dok gimiko jegalanirangko ong∙atna ine JAC manchisoengachim indiba sorkarini rai-ko parakatani ja∙mano uarangko dakjawa ine tik ka∙angaha.
VDA-ko bariatanichi ru∙uta bilsirangna ka∙soenggipa muster roll worker-rang bang∙bate namgnirangko man∙gnok ine Pariat aganangaha. Una agreba, bilsi gnina ia VDA-ko man∙angkuanichi muster roll worker-rangna uamangni dedrangko poraiatna aro bilsi re∙angahaona tangkarangko chimonge donsona dakchakgen ine ua agandapangaha.
“EPF-an gamchatbatgipa ong∙a. Iani bidingo JAC lekka sedoe on∙aha aro April 9-o skotong minister-ko grongon, department-rango, company-rango aro sak 20-na bate rakkie kam ka∙enggipa contractorrangni ning∙o donggipa pilak daily wage worker-rangna EPF-ko on∙na ine ma∙mong sorkari ra∙chake on∙manaha ine skotong minister ku∙chake on∙angaha,” ine Pariat talatangaha.
Uandake, EPF-ko ra∙gatna nanga ine Labour Commissioner dingtang dingtang department-rangna see u∙iataha ineba ua agandapangaha aro kam ka∙giparangna ian nangchongmotgipa dakchakani ong∙a ine official-rangko uamangna ia cholko dake on∙china ineba ua mol∙molangaha.
Una agreba, daily wage worker-rangkoba uamang baksa bakrime EPF-ko ra∙gatchina officer-rangko mol∙molnchina Pariat didiangaha aro uamangni man∙na nanggipa 12%-ko on∙gen inenba, EPF-o pension-koba man∙a ine ua janapangaha.
