Guwahati, May 29: Robibar pringo, Myanmar a·songni sak 26 manderangko, Assam a·dokni Silchar jillaona Innova gariko para ra·e re·bamitingo Silchar-ni police-rang rim·aha.
Police-rangni u·iatani gitade, ia manderang, Sonibar walon Jammu-oni rel gario re·bae Guwahati songjinmani Kamakhya railway station-ona sokbaahachim.
Rim·ako man·gipa sak 26 manderangoni sakdokde me·chikrang, sakdokde me·asarang aro gipinrangde bi·sarang ong·achim.
Ia manderangni gimin am·sandianirangko dakon, uamangko Silchar-oni saoba mande saksasa phone ka·e Silchar-ona okamataha ine Cachar-ni SP Ramandeep Kaur parakataha.
“Da·o dipet chinga ia manderangko Myanmar-oni Muslim-rang ine ma·siana agrede mamingkoba ma·sidapna man·kujaenga indiba uamang niam gri India-ona re·baahani gimin niamo pangchake chinga ia manderangko rim·aha,” ine Cachar SP parakataha.
Koborko on·ani gitade, Myanmar a·songo Rohingya-rangko dokkol ka·miting somoirango, uamangoni bang·batan Myanmar a·songko wate Jammu & Kashmir-o sriksrik katnapeaha aro baditaba bilsirangni ja·man Delhi-ona apjitange ja·mano Assam-ona katnapskaahachim.
