Shillong, Naitung 11: Ka Meghalaya kala pyninam ia ka ioh ka kot lyngba u sohtrun hakhmat jong ki nongthied ka ri bad ki nongkhaii ban pyni kumno ba une u soh uba die ha ka dor T.12 shi Kg na ki jaka rep ulah ban pynkylla sha ki mar ki ban shongdor haduh T.1,500 shi Kg ha ki Iew shabar ka ri.
Kane ka kyrwoh kala mih ha ka jingplie ia ka Fourth Meghalaya Pineapple Festival ha Dilli Haat ha ka 10 tarik u Naitung, ha kaba u Myntri Rangbah u Conrad K. Sangma bad u Union DoNER Minister u Jyotiraditya M. Scindia kila kdew ia u sohtrun uba khlem ai dawai kum ka khana kaba seisoh ha ka jingdon ia ka dor bad ka jinglah ban pyniasoh bad ki iew ki hat. Kumba 50 ngut ki nongrep bad 50 ngut ki nongseng kam na Meghalaya kila iashimbynta ha kane ka tamasa kaba 3 sngi.
U Sangma ula ong, ba kane ka tamasa kala kylla long palat ia ka jingrakhe ia ka jingrep sha ka rynsan kaba pyniasoh ia ki nongrep beit beit bad ki nongthied bad ki nongkhaii, ki nongsain ia ki marbam, ki kompani bad ki kynhun khaii kiba heh.
Ka Meghalaya ka rep ia u sohtrun ha ka jaka kaba palat 12,600 hektar, kaba pynmih palat ia ka 1.4 lakh metric ton man la ka snem.
Ka jylla kaba pynmih khlem ka jingai dawai u jait sohtrun uba la tip kum u ‘Kew’, udei uba la bna nam uba khlain ha ka jingthiang uba don kumba 18° Brix, ula kylla long syndon kumu u soh ba pawnam ka Meghalaya.
Ka sorkar kala ong ba ka jingbei tyngka kaba iaineh ha ka rukom saiñ bad ka iew ka hat kala kiew bha ha ka jingiohnong. Nalor u sohtrun uba lah pyntyrkhong bha uba la lah ban pyniaid iew jan kumba T.1,500 shi kg ha ka dewbah Europe, katba u Individually Quick Frozen (IQF) Sohtrun udei uba lah die ha ka dor T.640 shi kg, kaba pyni ia ka jingiohnong bha ban ia kaba shu die kumto ia u soh uba im.
Ka jingpynmih ia u sohtrun ha ka jylla kadei mynta kaba la ioh ia ka jingkyrshan da palat 500 tylli ki kynhun jong ki nongrep, kaba wanrah lang ia jan kumba shi lak ngut ki nongthung. Napdeng ki khana kiba seisoh kadei ka Jirang Organic Agro Farmer Producer Company ha Ri-Bhoi, ha kaba 433 ngut ki nongrep lo shalan sha ka Lulu Group, Reliance Retail, Safal bad Blinkit. Ka FPO ruh ka pyniaid nyngkong eh ia ka umsoh u sohtrun uba na Meghalaya.
Ki sohtrun na Meghalaya kidei ruh kiba la poi sha ki iew ki hat ha Dubai, Abu Dhabi, Kuwait bad Sharjah. Ha u bnai ba lah dep, ka Myntri Pla Tyngka ka Ri ka Nirmala Sitharaman kala kaweh ia ka lama kum ka jingphah shalan Ar Ton u sohtrun uba khlem ai dawai na Jirang sha ka Lulu Retail ha Dubai. Ka jylla mynta ka don ia ka jingthmu ban wanrah shi lak hektar hapoh jong ka jingrep khlem ai dawai ne organic cultivation hapoh jong u snem 2028.
Naduh ba lah sdang ha u snem 2023, kane ka tamasa suki pa suki kala sdang ban iar bha. Ha u snem ba lah dep kala pynmih ia ka jingseisoh ban iatehkular ban pyniaid iew da ka Reliance Fresh, Amazon Karigar bad Blue Tokai Coffee Roasters, kaba pyni ba kane ka tamasa kala nang kiew ha kaban plie ia ki iew kiba thymmai na ka bynta ki jaka rep jong ka Meghalaya.
Pule ruh : Pyntip u Bah Sanbor | Sngewtynnad ka jubab na Ophis u Lat ia ka jingkyrpad pyrshah ia ka KHADC Bill
Peit ruh :
Wad ia ki khubor ba dang shu jia na man ki jaka kyndong ka thain Shatei Lam Mihngi ha hubnetwork.in, ka tyllong khubor online jong phi ban lap ia man ki khubor ba dang jia, ki jingring durkhih.
Bud ruh ia ki ha ka
Twitter – twitter.com/nemediahub
Youtube channel – www.youtube.com/@NortheastMediaHub2020
Instagram – www.instagram.com/ne_media_hub
Download ia ka app jong ngi na playstore – Northeast Media Hub
