Kohima, June 20: Batanggimin antirango Nagaland a•dokni dingtang dingtang biaprango, atchidaldaloni bilsi 10 ong•gipa bi•sarangni COVID-19 man•ani ka•sine batrorobaenganiko nikna man•aha.
Nagaland health department-ni see rakkianiko parakani gitade, anti gittamni gisepon ia bilsini gisepo ong•gipa sak 155 bi•sarang COVID-19-ko man•dapaha aro da•o dipet Nagaland a•doko COVID-19-na porikka ra•anio positive ong•gipa bi•sarang gimik sak 826 gapaha.
Ia sak 826 bi•sarangoni sak 360-de 2020 bilsio man•aha aro ia 2021 bilsini gisepon sak 466 gapengahani gimin 1 percent-chi batengaha.
Indake ong•genchimoba, da•o dipet ia bilsini gisepo ong•gipa bi•sarangni COVID man•e siani kobor dongskakuja indiba bilsi 14-ni ning•o ong•gipa bi•sarangde COVID man•e sia dongskaaha ine health department-oni u•iataha.
Batanggimin anti gittamni gisepo, Nagaland a•doko bilsi 11-oni bilsi 20-ona sak 374, bilsi 21-oni bilsi 30-ona sak 684, bilsi 31-oni bilsi 40-ona sak 708, bilsi 41-oni bilsi 50-ona sak 447, bilsi 51-oni bilsi 60-ona sak 295 aro bilsi 61-oni bilsi 99-ona gimik sak 219 Covid-19-ko man•aha ine kobor on•aha.
Nagaland health department-oni u•iatani gitade, da•o brigipa antina joljol Nagaland a•doko Covid-ko man•ani komiangkalaha aro COVID man•e sianirangba da•o gittamgipa antina adita komiangaha.
