Tura, Feb 11: Garo Hills Autonomous District Council (GHADC) election-ko re•baenggipa April jani 9 tariko ong•atna siengani gimin, an•tangtangni dilgiparangko seokengon, name chanchichengesa seokchina gita Nationalist Congress Party (NCP)-ni state president aro Gambegre-ni MLA Saleng A Sangma, seokgiparangko didiangaha.
Sangma-ni aganani gitade, election-na skang pilak political dolrangan, seokgiparangko salna gita dingtang dingtang ku•rachakanirangko on•ronga indiba dilgiparangko seokenggipa manderangsa an•tangtangan chanchichenge dilgiparangko seokna gita nanga.
“Dilgiparangko seokenggipa manderang an•tangtangan mikkangchi neng•nikanirangko nangama ba pattianirangko nanga uko chanchichengna gita nanga aro dilgiparangko seokani somoion name chanchie seokna nanga,” ine NCP-ni state president aganaha.
Election-ni ja•mano an•tangtangni seokgimin candidate-rangko matnangede maming namgni dongjawaha uni gimin dilgiparangko seokengmiting somoion name chanchichengesa seokna nanga ineba Sangma aganaha.
Mikkangchi ong•atna sienggipa election-rangni gimin sing•on, GHADC election-o adita sak candidate-rangko susaatna gita ma•mongni NCP dilgiparangna u•iatmanaha aro uamang obostarangko ma•sichakenga ine NCP-ni state president parakataha.
“Election-na skang gipin dolrang baksa bakrimani bidingo da•o dipet chinga chanchia dongkuja indiba chinga candidate-rangko seokna kamrangko a•bachengatmanaha aro candidate-ni bimingrangko bakan jinmana parakatgen,” ineba Sangma aganaha.
Ia chang GHADC election-o NCP dolni gita komibeoba damgittam ba dambri biaprango candidate-rangko susaatna miksongenga ine kobor on•aha.
