Shillong, Apr 3: Re·anggipa March 5 tarikoni March 12 tarikona Arunachal Pradesh a·dokni Yingkiong-o donggipa Siang chibima aro East Siang District-ni Pasighat-o ong·atanggipa chang 15-gipa National Rafting Championship R-4-o Meghalaya a·dokoniba World Rafting Federation (WRF)-ni ra·chakgimin Rafting dol skanggipa changna bakko ra·epaaha.
Ia rafting dolko Shillong-oni Banjop Iawphniaw dilaha aro ia dolni gipin membor-rangara Ri Bhoi a·jaoni Kobek Mawnai, Gilbert Kharkrang, Pynshngain Kurbah aro Robert Dkhar ong·a.
National Rafting Championship-o bakko ra·egipa Meghalaya a·dokni manderang Umtrew chibimaosa choe nikkuenggipa manderang ong·achim aro ia susaanio bakko ra·aniara uamangna dal·begipa ra·biani gita ong·ahachim.
Ia rafting dolna Meghalayan Age Limited-ni gita tangka paisarangko dakchake on·aha aro ia susaanio bakko ra·eahani gimin ia dolni membor sakpraknan gong 10,000/- ka·e boksisko on·aha.
