Williamnagar, July 29: Williamnagar-ni mingsinggipa Nengmandalgre Community Fish Sanctuary-o Fishery Department-ni rike on•gipa gital Boat House-ko July 29 tariko, Williamnagar-ni MLA aro sorkarini Chief Whip Marcuise N. Marak, ADC Tangchiring K. Sangma, Albert G. Momin, Fishery Department-ni Superintendent H.S. Sangma aro fishery department-ni gipin officer-rangni dongpaanio oprake on•angaha.
Ia program-o mongsonggipa ong•e sokbagiparangko pul malarangchi mande raaniko dakjagenchimoba, uamangna Nengmandalgre-ni tobegipa aro similgipa na•tok granrangko koksepo name chipe on•e mande ra•aniko dakangaha.
Tom•aniko Nengmandalgre Community Fish Sanctuary-ni Padot Reverend Jimmy Carter Sangma dakdila. Fishery Department-ni Superintendent H.S. Sangma, ia boat house aro ringrangko man•bana uamang maidake kam ka•ahachim uako talate, Williamnagar MLA-ni jak on•pae chu•sokatna man•anina MLA-ko jinmani pal ua mittelpilangaha.
Williamnagar-ni gital ADC, Albert G. Momin, Nengmandalgre Community Fish Sactuary-ko maidake namdapatna man•gen aro uamang iako namdapatna gita mairangko dakna nanggen, uani gimin jinmana agan-talate on•angskaaha.
Sokgiparangoni Tangchiring K. Sangma, jean Williamnagar-ni ADC-ba ong•engachim, ua Nengmandalgre Fish Sactuary-ni nitoani gimin agane, maikai ia sactuary-ko nirokenggipa dolrang tangka-paisa man•aniko tang•doatna man•gen uani gimin jinmana talate on•angskaaha.
Tom•anio mongsonggipa ong•e sokgipa Williamnagar-ni MLA Marcuise N. Marak, ia nambegipa kamko chu•sokatna kam ka•gipa fishery department aro ia sanctuary-ko nirokenggipa dolni padot Reverend Jimmy Carter Sangma-ko uni bimchipe aro gisiko nange kam ka•anina mittelange, sorkarini songko-noko namdapatna kam ka•ani gimin talatanirangko on•angaha.
Ia program-o PMMSY-Water, Life and Livelihood Mission 2021-2022-ni gita chirikam joljol a•a ruronganirangko champengna miksonge bolrangkoba ge•angaha.
Bon•kamao, Fishery department-ni adita tarigipa ring choani niamrangko sanctuary-ni padotni jako, mongsonggipa ong•e sokgipa, Marcuise N. Marak-ni jakchi on•e, ring ba kayak ge•briko pakwate, joljol sokbagiparangna aro songni manderangna ia ringrangko choe nichina gita cholko on•aha. Bang•a manderangni mikkango iako dake on•ahani gimin kusi ong•aniko ia salo nikna man•aha.
