Tura, Nov 17: North Garo Hills a•jani Manikganj Secondary School aro Damas Higher Secondary School-ko Budbar salo, Meghalaya a•dokni Chief Minister Conrad K Sangma-ni jakchi nokdonggae on•angaha aro ia skul nokrangko nokdonggae on•angani somoio a•dokni Education Minister Lahkmen Rymbui, Assembly-ni Deputy Speaker Timothy D Shira, Kharkutta-ni MLA Rupert Momin, Bajengdoba-ni MLA Pongseng Marak aro gipinrangba dongpae bak ra•angaha.
Ia skul nokrangko rikna gita Supporting Human Development Project-ni ning•o Asian Development Bank (ADB)-ni gita tangka paisarangko dakchakaha aro ia project-ni ning•o Manikganj Secondary School-na gital classroom dambongako aro Damas Secondary School-na classroom damdokko rikdape on•aha. Ia skul damgnion computer room baksana digital classroom-rangkoba rike on•aha.
Indake ong•engon, sorkarini ra•gatgipa Farmers’ Collectivisation for Upscaling of Production & Marketing Systems (FOCUS)-ni ning•o North Garo Hills a•jani dol 32 producers group-rangna Chief Minister-ni jakchi gong lak 23-na batgipa cheque-rangkoba ia apsan salon suale on•angjolaha.
