Shillong, Jylliew 16 : U Myntri Rangbah ka Jylla Conrad K Sangma ula pyntip ha ka Meghalaya Sports Conclave ha ka sngi Ba-ar, ba ka jingkynshew ka Jylla ha ki kam ialehkai ka dei kaba ialam da ka thong ba kham iar kata ban tei ia ka jinglong bad ka kabu na ka bynta ki samla, ym tang ban iabeh ka ioh takma.

Haba phaidien sha ka samoi treikam ka Sorkar naduh u 2018, u Conrad ula ong ba ka Sorkar kala sdang ia ka samoi treikam da ka jingmad ia “bun bah ki jingeh” hynrei kala jied ban phaikhmat sha ki “kabu ha kine ki jingeh”.

U la pynpaw ïa kine ki hynñiew snem ba la leit kum ka jingïaid lynti ban pynbeit ïa ki “jingeh ha ka rukom treikam bad ki bynta kiba kongsan jong ka synshar khadar, ka jingpynroi ia ka sap, ka lynti iaid, ka thong.”

Ka jingthmu, u ong, ka long ban “pynkylla bad pynbeit thymmai ialade bad ban ialam ia ngi sha kata ka thong bad ka jingiohi jngai kaba ngi don, ia kiba ngi la buh ba ha kine ki 15 snem ban wan, ngin sa poi shatei”.Haba buh ia ki samla ha ka jaka ba kongsan eh jong ka Policy, u Myntri Rangbah ula ong “Na kiba bun ki jingeh ba ngi la iohi bad ki kabu kiba mih na kine ki jingeh, ngi sngewthuh ba ki samla ka Jylla jong ngi ki don hapdeng eh bad ka mynsiem jong kaei kaba ngi kwah ban kynjoh bad kaei ka dei ka lynti iaid ba sdang jong ngi ha ki kam ialehkai”.

Haba pdiang ba “baroh ngi kwah takma, ngi angnud ban iohi ba ngi jop takma ha ki lympung ialehkai-kane ka dei ka jingthmu kaba khatduh eh” hynrei ula ban jur ba ka jingthmu ba kham heh ka long ban “pynlong ia ki kam ialehkai kum ka rukom im bad ban pynthikna ba ki jingialehkai ki iarap ia ngi ban pynwandur ia ka lawei bad pynwandur ia ka jinglong jong uwei pa uwei u samla ka Jylla jong ngi”.

U Conrad ula pynpaw ba ki rai jong ka Sorkar “kim dei bad ym dei ban shu pynshong nongrim tang ha ka jingjop ia ki takma”.

Ula pyniasnoh ia ki thong jong ki kam ialehkai bad ki jingpyrshang ha ka put ka tem, ki jingnang trei ia ki kam bapher bapher bad ka sengkam lajong. Hapoh ka CM Meghalaya Grassroot programme, “7000 ngut ki kaitor kila ioh ia ka jing kyrshan na ka Sorkar ban kin iatem ha ki surok/lynti iaid (busking), ban tem ha ki jaka jngohkai, ha ki restaurant, kumta ki la ioh ban leh ia kaei kaba ki sngewtynnad eh ban leh bad ki da ioh da ki jingsiew ia kane”.

Kum kane ka jingkyrshan la ai ruh sha ka “Fashion, la ka long ka jingshna music videos, documentaries, ne ka matti thaw” katba ia ki skhim kum ka CM Elevate bad PRIME la pynlait namar “ki dei ruh kiwei pat ki lad kamai ha kaba ki samla ki donkam ia ka jingai mynsiem ba kin nud shim rai, kin rai da ka jingpyrkhat bad sa pynkylla ia ki jingduna ha ka iew sha ki kabu bad ki buit treikam”.

Ula mynjur ba ka pule puthi ka dang iai long ka jingeh hynrei ula ong pat ba ka Sorkar “suki pa suki kala iaid ha ka lynti kaba dei ha kaba ngin sa iohi ia ki jingkylla ha ka pule puthi ia kaba ngi sngew ba ki dei ban don”.

Haba kren halor ka jinglong ki nongshongshnong ka Meghalaya, u Conrad ula pynpaw ba “18 lak ki dei ki U-20 kaba mut 50% na ki nongshongshnong jong ngi ki dei kiba hapoh ka rta ba 20 snem”.

Ula bynrap ba ka jingdon briew ha Meghalaya ka dei kaba synshar da ki samla : “Phin sa lyngngoh ban tip ba ka Meghalaya ka dei kaba don bun eh ki GenAlpha-kumta ngi don ia ka jingdon paid kum ki pyramid ha kaba kiba bun eh ki nongshongshnong ki dei ki GenBeta bad GenAlpha bad sa wan ki GenZ. Nga pan map GenZ, phi dei kiba duna paid mynta hapoh ka Jylla Meghalaya”.

Halor ka jingpynlong ia ka National Games, u Conrad ula ong ba kane ka jingiathong dalade ka dei ka dak jong ka jingkiew. “Mynta ia ka Jylla kum ka Meghalaya ban phohsniew ha kaban pynlong ia kat ka National Games ka dei ka jingjop ia ngi” ula ong haba pynshai ba kane ka lympung kam dei “tang kawei ka lympung, ka dei shibynta jong ka project kaba la pynkhreh bad bala pyrkhat bha ban jam shakhmat”.

Haba kren halor ka histori ka Meghalaya ban wanphai khlem ki takma na ki lympung, u Conrad ula kdew ia ka sha ka “jingbym don ka rukom pyrkhat kaba biang bad ka jingkynshew kaba biang ha kine ki bun tylli ki snem bala leit noh”.

Ula bynrap “Ngi la iohi ia ka jingkylla mynta. Ngi la iohi ia kane ka jingkylla bad ka jingiaid shaphrang kaba la jia katba ngi dang iakren. Ngam ong ba ngi la jan poi sha kaei kaba ngi kwah ban poi, ngi dang don shajngai bha hynrei nga ong ia phi ba ngi la iaid sha kata ka lynti”

Ula pynkut da kaba pan ia ki jingai jingmut na ki paidbah bad ong “Nga kwah ban iohsngew ia ki jingkynthoh kiba tei. Nga kwah ban iohsngew ia ki mat kiba lah ban leh eiei”.
U Myntri ka kam ialehkai ka Jylla Bah Wailadmiki Shylla ruh ula kren ha kane ka conclave, kaba la khring ia ki nongialehkai Olympics, ki riewshemphang ha ki kam ialehkai, ki heh ophisar bad ki heh ki hain kiba wan na kylleng ka Ri.

Pule ruh : Ka Meghalaya kan long ka khyrdop khaii pateng ka NE da ka jingpyntrei ia ki Highway ba T.39,800 klur : Gadkari

Peit ruh :

Wad ia ki khubor ba dang shu jia na man ki jaka kyndong ka thain Shatei Lam Mihngi ha hubnetwork.in, ka tyllong khubor online jong phi ban lap ia man ki khubor ba dang jia, ki jingring durkhih.

Bud ruh ia ki ha ka

Twitter – twitter.com/nemediahub

Youtube channel – www.youtube.com/@NortheastMediaHub2020

Instagram – www.instagram.com/ne_media_hub

Download ia ka app jong ngi na playstore – Northeast Media Hub