Shillong, Nov 30: Re·anggipa November 24 tariko Shillong-o adita sak manderangchi chadrapako man·e Guwahati-ni GNRC Hospital-o da·o sana-bananiko ra·enggipa Customs and Centre Excise-ni Inspector, Pa Alok Kumar-ko Butbar salo, Meghalaya BJP-ni MLA Pa Sanbor Shullai baksana BJP dolni padot Pa Ernest Mawrie-maang grongeaha.
Uandake, saksa officer-ko kragija chadrapani bidingo BJP-ni dilgiparang suk ong·gijaniko parakangtokaha aro Pa Kumar-ko sana-bananio hospital-o gamna nangnirango adita dakchakaniko on·na gita tangka-paisarangkoba on·bajolaha.
Unsalo an·tangko doka-satani bidingo Pa Kumar, an·tangko grongna re·anggipa BJP-ni dilgiparangna talate on·aha. Pa Kumar-ni ba·rimaoni u·iatani gita, iana skangde Pa Kumar nachilo teke knana man·gipa bostuko jakkalgijan aditade knana man·kuachim indiba da·o bate knajabataha ine parakataha.
Doka-sata man·gipa Pa Kumar-ni aganatani gitade, Mukroh-o obosta ong·mitingo anga Shillong-o training dongengachim. Unomiting anga be·en an·sengjani gimin sam brena re·angaha, indiba rasong grie unsalo NGO-rangni re·jomani a·sel sam dokanrang bang·batan chiptokaha, indiba ja·mano Police Bazar-oniko sam breeming ja·achi re·bapilengachim ine agan-talataha.
Uandake, ja·achi re·baengmitingo mande darangba grigipa IGP sambao adita sak ta·makku ringe roenggipa me·asarang dongachim jemangan angko ki·sangchini chadrapaha ine Pa Kumar janapataha.
