Williamnagar, Feb 12: South West Garo Hills a•jani Garobadha-o damsa mingnambegipa Nirupama Memorial Secondary School-ni bilsi 25 gapaniko Mongolbar salo, mikkim gnangbee maniangaha.
Ia skulko 2001 bilsio, ua somoio Junior Engineer ong•e kam ka•enggipa Subir M Marak, Garobadha jolrango poraienggipa bi•sarangna namgipa lekka porako on•na miksonganio kuliaha. Ia skulko kuligipa Subir Marak, ja•mano sorkarini kamko wate politics-ni kamrangko jako ra•skaaha aro da•o ua Rangsakona constituency-o MLA ong•e, jolni manderangna dangdike on•skaengaha.
Ia skulni bilsi 25 gapaniko manianio, Meghalaya a•dokni Education Minister Lahkmen Rymbui, mongsonggipa sokgipa ong•e bak ra•angaha aro unbaksana Selsella-ni MLA Arbinstone B Marak-ba okamatako man•e bak ra•angaha. Ia tom•anio, South West Garo Hills a•jani Deputy Commissioner Anendya Raajsshre, SP Vikash Varma, Captain Williamson Sangma State University-ni Pro-Vice Chancellor Dr Vasanthi Vijayakumar, apsan university-ni Registrar Ambrose Ch Marak, ICFAI University-ni Director Proloy M Sangma, MBOSE-ni Director of Administration Manseng R Marak, skulni gitcham skigiparang, gitcham chatro chatrirang, ma•a paarang aro gipinrangba dongpae bak ra•angtokaha.
Ia tom•aniko, Garobadha Mondolini Rev Walsing M Marak-chi Isolo bi•e a•bachengataha aro ia tom•anio skulni nokgipa aro Rangsakona-ni MLA Subir M Marak, tom•bagiparangna rimchaksoani kattarangko aganangengon, ia skulko uni ma•gipa Nirupama M Marak-ko gisik ra•na gita uni bimingchi mingaha ine talataniko on•angaha.
Ia skulni bilsi 25 gapaniko maniaona sokbagiparangna mittelpilaniko aganangengon, ia skulni Silver Jubilee-ko bilsi gimik dingtang dingtang program-rangko ong•ate manianggen aro ia manianiko re•baenggipa 2027 bilsini February jao matchotatgen ine Marak parakataha.
Ia tom•anio mongsonggipa ong•e sokgipa a•dokni Education Minister, ia skulni gital nokko rikna gita pangchakaniko songe on•angaha aro ia Silver Jubilee maniani Souvenir-koba oprake on•angjolaha.
Ia manianio, skulo poraienggipa chatro chatrirang, dingtang dingtang jatrang, jekai Garo, Hajong, Koch, Mizo aro uandakgipa jatrangni chrok mesaani aro ring•anirangko mesokangaha aro unbaksana fashion show, fancy dress competition aro uandakgipa program-rangkoba ia salo ong•atangaha.
Ia skulni bilsi 25 gapaniko manianio a•dokni Education Minister, tom•anio bak ra•giparangna aganprakangengon, bida budiko on•anio bilsi 25 gapahani gimin ia skulna an•tangni namgipa skanirangko on•angenba, ia skulko kuligipa Subir Marak-ko saksa niksamsoani gnang kamko ka•gipa aro dilgipa ine parakangaha. A•gilsakni seng•anichi joltangna aro jatna namroro silroroaniko ra•bana gita on•gilangkuchina ua, jolo songdongenggipa manderangkoba didiangaha.
Chief Minister Conrad K Sangma-ni dilanichi Meghalaya a•doko lekka porani kamrang namen tang•dobataha ine janapatengon, a•dokni pilak biaprangon gital skul aro college-rangko bang•en kulidapaha ine Rymbui aganaha.
Program matchotani ja•man Hub News baksa agangrikengon, ia skulni chu•sokgipa ong•anina skulni gitcham aro da•o skie on•enggipa pilak skigiparangkon skulni nokgipa aro Rangsakona MLA Subir M Marak mittelpilangaha. Ia skulo ka•dongchakaniko mesokahani gimin ua dingtangmancha chatro chatrirangko aro ma•a paarangkoba mittelpilangaha. 2028 bilsini gisepon ia skulo higher secondary aro degree college-ko kulidapna miksongenga ineba Marak parakataha.
Jolni pamong aro skulni skanggipa batch-o membor ong•e kamko ka•gipa Chingchang A Sangma-ba ia skulni bilsi 25 gapaniko nikna man•ahani gimin an•tangni kusi ong•aniko parakataha.
Na·simang iakoba nina man·gen:
Na·simang iakoba poraina man·gen: Assam CM, sakkigri ong·gija matnanganina Congress dilgiparangni kosako civil defamation case-ko ka·doa
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
