Williamnagar, Apr 22: Garo Hills Autonomous District Council (GHADC)-o A•king Nokmako ra•galpilani case-o kachario serikanirangko taridapaha aro dingtang dingtang ong•gija kamrangko ka•aha ine ra•gala man•gipa Nokma Presina D Sangma aro uni nokdangni manderang, Williamnagar Police Station-o FIR ka•doangaha.
FIR-o janapani gitade, uni Nokma ong•aniko ra•galchina gita Krishbina D Sangma aro gipinrang, GHADC-ni kachario mokordoma ka•aha aro ia case-ko GHADC-ni gitcham Deputy Chief Executive Membor, Land & Revenue In-charge Nikman Ch Marak-ni kachario hearing dakaha. Ia case-ni bidingo hearing-ko dakengon, sikkelani gnangsa hearing-rangko dakaha aro tarikrangkoba name u•iatchengani gri, baditaba salrangni gisepon hearing-ko ong•ataha ineba FIR-o matnangaha.
March-ni 5 tariko dolgnian kachario dongani gimin, March-ni 9 tarikko changgipin hearing-na tik ka•angenba, an•tangtangni jera ra•na nanganirangko seachi on•china gita somoiko on•aha ine janapatengon, unsalo uamangni medical-o pangchake hearing dakaniko dontongchengchina bi•anikoba, maming talatani gri kachari jechakaiaha aro dolsani agananirangkosan knaangaiaha ine FIR-o badi ka•giparang parakataha.
March-ni 9 tariko on•gipa final order-ko pakwatani bidingo sing•doangskaengon, ia order ba ge•etaniko uamang baditaba antirangna sandieahaoba office-o man•jaha aro iani ja•man April-ni 1 tariko uamang dorgastoko on•eaha ine janapatenba, ia final order-ko April-ni 13 tarikosa uamangna mesokna man•aha ine FIR-o parakataha.
March-ni 24 tariko, ia order-ni certify ka•gipa copy-ko on•ani somoio Nikman Ch Marak-de, GHADC-ni Deputy CEM, Land & Revenue-ni I/c ong•jahani gimin ia order-o uni soi ka•aniara niam gita ong•jaha ineba FIR-o janapataha.
March-ni 9 tariko on•gipa order-o serikanirangko uamang nipilon, uano den•galani, sedapdapani aro mongsonggipa bakrangon sepiltaianirangkoba nikna man•ahani gimin ian official lekkarangko taridapaniko mesokani ong•aha ineba badi ka•gipa manderang, FIR-o matnangataha.
Final order ba bon•kamgipa ge•etani lekkako ru•uta somoirangna office-o nikna man•jahani gimin ian ong•a obostako taridapna jotton ka•a gita ong•a ineba FIR-o janapataha.
FIR ka•anio ja•manchakahani gimin talataniko on•angskaengon, uamang kacharini order-ko donchengkuchina gita April 15 tariko, mol•molani dorgastoko galchengaha indiba April-ni 17 tarikosa, serikanirangko name nipilani ja•man, niam pe•anirangko nike police-rango FIR ka•eaha ine badi ka•gipa manderang parakataha.
Iani bidingo ning•tue am•sandianirangko dakchina aro niam pe•anio jak donggipa manderangni kosako rakgipa ja•kurangko de•china gitaba ia manderang, FIR-o police-rangko didiataha.
Pilak nanga lekkarangko uamang on•aha aro police-rang baksa bakrimaniko on•na ku•rachakenga ineba badi ka•gipa manderang FIR-o parakataha.
Also read: Assam-ni Sonari-o siaha ine so·e galgimin mande nokona re·bapila
Watch
Find latest news from every corner of Northeast India at hubnetwork.in, your online source for breaking news, video coverage.
Also, Follow us on
Twitter-twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
Download our app from playstore – Northeast Media Hub
