Guwahati, July 22: Ra·chakna amgijagipa noksa baksa adita kattarangko see an·tangni mobile Whatsapp status-o watdoatgipa Assam, Nalbari-ni Kamarkuchi songoni saksa me·chikko Nalbari police Bristibar salo rim·aha.

Iani bidingo police-ni aganatani gitade, saksa Pakiza Begum minggipa mija Butbar salo sigimin matchu mangsani noksako watdoataha aro gnigipa noksao ua, adita teng matchu be·en baksana ian Assam a·dokni skotong minister Pa Himanta Biswa Sarma-na dingtangmancha boksis ong·a ine seenba uni Whatsapp status-o watdoatahachim.

Mija Butbar salo Muslim toromko ra·giparang a·gilsak gimikchi Eid-ko maniangaha, indake ong·engon, skotong minister-ko dingtangmancha miksonge ra·chakna man·gijagipa katta ba noksarangko wate mesokataniara kraa ong·ja aro ian jatgnigni gisepo kajiako ra·bana man·a, ine ja·pangoni saksa koborna parakataha.

Ia mamlani bidingo, jatgnini gisepo kajia-golmalko ong·atna gita jotton ka·anina Vishva Hindu Parishad(VHP), Nalbari unit, Nalbari police station-o mokordoma ka·angaha.

Iandake ra·chakna man·gija kattarangko see parakataniara Hindu jatko chonnikani ong·a.

Chasongrangoni manibaenggipa toromni kosako indake chonnike roaniko chinga ra·chakna man·jawa maina Hindu-rang, matchu-ko rongtalgipa dake chana, ine Nalbari VHP-oni saksa matnange aganaha.

Unomiting, Nalbari Superintendent of police Pa Pabindra Kumar Nath-ni koborna aganatani gita, ua me·chikni kosako ‘Suomoto’ case-ko segatange uko rim·aha indiba ian jamino jokaigipa dos dakanisa ong·ani gimin uko ja·mano watpilataha.

Indake ong·engon, adita salrangna skang matchurangna dingtangmancha naljokaniko on·na gita Assam Cattle Preservation Act, 2021-ko Assam sorkarini ra·chakanga ja·man iandakgipa mamlako a·doko segatchenganiba ong·enga.