Williamnagar, Sep 1: Sombar salo, Lok Sabha-ni gitcham Speaker Purno A•gitok Sangma-ni chang 78-gipa atchiani sal aro National People’s Party (NPP)-ni bilsi 13 gapaniko, Williamnagar-o manidimaha.
Ia manianiko Rongrenggre Government Higher Secondary School-ni kal•chakramo ong•ataha aro ia manianio hajalni hajal manderang bakko ra•e, PA Sangma sagina mande ra•pilskaaniko on•angaha.
Ia manianiko dingtangmancha pringni bako git ring•susaaniko ong•atanichi a•bachengataha aro uni ja•man coffee table book aro PA Sangma Museum-ko a•dokni Cabinet Minister aro Williamnagar-ni MLA Marcuise N Marak, oprake on•angaha. Ia museum-o PA Sangma sagini janggi tangani aro uni mingnamgipa kamrangko gisik ra•na gita manderangna mesoke donaha. PA Sangma sagini miksonganirangko aro uni kamrangko manderangna, mongsongbate chadamberangna ma•siate on•na miksonganio ia museum-ko kuliaha.
Ja•mano ia museum-ko a•dokni Chief Minister Conrad K Sangma, uni jikgipa aro gipin dilgiparangba niangaha.
Iani ja•man dingtangmancha jinma tom•bimonganiko salni 1:00 baji dipet a•bachengataha aro ia program-ko a•bachengatanio NPP-ni gitko jinma ring•ani ja•man PA Sangma sagini jikgipa Soradini K Sangma aro Chief Minister Conrad K Sangma, PA Sangma sagina pulrangchi mande ra•pilskaaniko dakangaha.
Ia tom•anio, rimchaksoani kattarangko a•dokni Cabinet Minister aro Williamnagar-ni MLA Marcuise N Marak aganangaha.
Ia salko manianio, dingtang dingtang political dolrangoni sak 250-na baten NPP-o napanggipa manderangkoba party-ona rimchaksoaha aro East Garo Hills a•jao dingtang dingtang kal•susaanirango chu•sokgipa manderangnaba PA Sangma Achievers’ Award-ko on•e mande ra•pilskaaniko on•angaha. PA Sangma sagiko gisik ra•ani bak gita aro uni kamrangna mittelpilskaani chin gita dingtangmancha ia tom•bimonganio, uni jikgipa Soradini K Sangma-naba mande ra•pilskaaniko dakangaha.
Ia tom•bimonganio, Arunachal Pradesh NPP-ni state president Thangwang Wangham, jinmana aganprakengon, uni PA Sangma sagi baksa apsan kam ka•rimarangko gisik ra•atpilenba, uko salgro salaram jolni saksa chong•mot dilgipa ine parakataha. NPP-ko mangrakbatatangkuchina aro party-ni miksonganirangko chu•sokatangkuchina gitaba ua manderangko didiangaha.
Ia tom•anio, Rajya Sabha-ni MP WR Kharlukhi-ba jinmana aganprakengon, PA Sangma sagi baksa kamrangko ka•rime uni skie ra•anirangko janapatenba, ua pangnan manderangni namgnina aro an•tangna chel•chakanirangko on•gipa manderangna ka•sae dangdike on•gipa ong•achim ine parakataha.
Ia tom•anio, Meghalaya a•dokni Deputy Chief Minister Sniawbhalang Dhar-ba jinmana aganprakengon, PA Sangma sagi baksa apsan kamrangko ka•rimna cholrangko man•jahani gimin an•tangni suk ong•gijaniko parakataha indiba uni niksamsoani gnang kamrangko ka•anichi Meghalaya a•dokko namroro silroroaniona ra•bana man•aha ine aganaha.
Ia salko manianio, Meghalaya Legislative Assembly-ni Speaker Thomas A Sangma-ba aganprakengon, PA Sangma sagini kamrangko aro dilgipa ong•aniko Tribal-rangna aro cholgri manderangna on•kange kam ka•anichin mesokaha ine parakataha. Ua Garo Hills-ni manderangnasan ong•aigija salgro salaram jol gimikni namgninan kamrangko ka•aha ineba Sangma aganaha.
Ia tom•anio, NPP-ni national working president James K Sangma-ba jinmana aganprakengon, ia tom•aniona re•bae bak ra•gipa salgro salaramni dingtang dingtang dilgiparangna mittelpilaniko parakangenba, uamangni ia tom•aniona re•bae bak ra•anian PA Sangma sagina nambatgipa mande ra•pilskaani ong•aha ine aganaha.
Ia salko manianio, Meghalaya a•dokni Chief Minister aro NPP-ni national president Conrad K Sangma-ba jinmana aganprakangengon, an•tangni pagipa sagi baksa Manipur a•dokona re•ange party-ko bikotani bidingo gisik ra•atpilaniko on•angaha. Tom•aniko a•bachengatanio, mande sakgnisan bak ra•genchimoba PA Sangma sagini ka•donganichin ia party-ko dal•roroatna man•aha ineba Sangma aganaha.
PA Sangma sagi dingtang dingtang ra•bianirangko chagrongna nanggenchimoba kamtangko aro bebera•atangko watgalgipa mande ong•jachim ine janapatengon, uni pagipa sagini a•selsa da•alo NPP, ia gadangona sokna man•aha ine Chief Minister aganaha. Salgro salaram jolni manderang pilakan PA Sangma sagi aro uni party-ko kusi ong•en ra•chaktokaha ineba ua rasong chabee aganaha.
Uni pagipa sagini biming Purno-ara ‘chu•sokgipa ong•anian’ ong•a ine talate on•angengon, uni biming gitan ua chu•sokgipa aro miksongani donggipa janggiko tangaha ine Conrad aganaha.
Na·simang iakoba nina man·gen:
Na·simang iakoba poraina man·gen: Arambai Tenggol-ni sakgni aro PREPAK-ni sakgittamko silchidarerang baksa rim·a
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
Download our app from playstore – Northeast Media Hub
