Tura, Feb 8: Mongolbar walni 10:45 bajimango Trinamool Congress (TMC) aro National People’s Party (NPP)-na kam ka•enggipa manderang, Phulbari constituency-ni Charbatapara songo dinggrikaha.
West Garo Hills District Election Officer (DEO)-ni u•iatani gitade, ua somoio NPP-ni Habibur Zaman aro uni manderang, ia song gita re•jomangengmiting somoio TMC-na kam ka•enggipa mitam manderang, uni Scorpio gariko nangata aro uandaken ja•mano dolgnini gisepo dinggrikani ong•kataha.
Ia a•selni bidingo koborko man•soa bakan Phulbari police station-ni dolsa sipairang, a•sel ong•gipa biapona re•ange so•sojengjeng ong•aniko namatna man•pilaha.
Ia a•sel ong•anio komibeoba saksku manderang saknaanirangko man•ahani gimin Phulbari CHC-ona be•enni gita porikka ra•e nina watatako man•aha indiba porikka ra•e niani ja•man uamang gimikkon watpilataha.
Saknaa man•gipa manderangoni saksa, chong•motan Nojrul Hoque minggipa mandekode uni mikron sambao mata bu•ako man•ahani gimin nambate sanna bananiko ra•china gita ku•pattie watataha.
DEO-ni u•iatani gitade, ia a•sel ong•ani somoio TMC-ni candidate SG Esmatur Mominin, TMC-ni Moni Mondol, TMC-ni Bhuttu aro NPP-ni MDC Habibur Zaman-ba dongachim.
Indake ong•engon, da•o ia biapo so•sojengjeng ong•anirang namangpilaha ine DEO parakatenba, ia a•selni bidingo tol•e jangbingbangatanirangko dakjachina aro election-ni somoio so•sojengjeng ong•atani kamrangko ka•jachina gitaba mikrakataniko on•ataha.
