Baghmara, Feb 15: Meghalaya a·doko bijolini bilko bikotenggipa Umiam chibimani da·o tiproroangani a·sel bijoliko chu·onga gita watna man·jaenganio salo konta 7 gape bijoli kimitaniko mijal February 14 tarik dipet a·bachengatahani gimin, South Garo Hills a·jani Garo Students’ Union (GSU), Mindikgre Regional Unit da·al Sombaro a·dokni Skotong minister aro Power Minister-na lekka sedoataha.

Iani bidingo songsalna dangdike on·enggipa GSU-ni padot, Grenith M. Sangma-ni koborna seachi u·iatani gita, re·anggipa bilsio namjabegipa sajinmani a·sel skul aro college-rango poraienggipa bi·sarangna klas ra·na man·gijanichi dal·en gimaani ong·aha ine talatenba, da·o adita salrangni gisepon bi·sarang bilsini porikkarangko sena tarisoengon, ia bakkandikgipa somoio bijoliko salanti kimitgenchimode poraienggipa bi·sarang namen neng·nikaniko chagrongtaignok ine suk ong·gijaniko parakataha.

Indake ong·engon, skul aro college-o poraienggipa bi·sarangni ru·utgijan senasienggipa porikkarang matchotani ja·mano bijoliko kimitchinaba GSU-ni dilgipa a·dokni skotong minister-na mol·mole seatgipao janapatjolaha.