Ampati, Feb 15: Piggery Mission 2020-21-ni ning·o South West Garo Hills a·jao songdongenggipa manderangna niamo pangchake wak jilaniko skie on·na gita dingtangmancha training program-ko anti gimikna Ampati-ni VTC-o ong·atenga aro ia training program-ko da·al Sombar salni bako South West Garo Hills a·jani Deputy Commissioner Ch Ramakrishna a·bachengate on·angaha.
Ia training program-ko ong·atna gita tangka paisarangko Meghalaya Livestock Entreprises & Advancement Society (M-LEADS) dakchake on·enga aro ia program-ko a·bachengate on·angani somoio South West Garo Hills a·jani Deputy Commissioner, jinmana aganprakangengon, wakrangko jilna gita cooperative society-rangna on·enggipa cholrangni bidingo talate on·angenba, kamtangtangko ka·anio tikkechina wak jilenggipa dingtang dingtanbg dolrangko didiangaha.
Iana skang, ia training program-ko ong·atani bidingo South West Garo Hills a·jani District AH & Veterinary Officer, Dr (Mrs) Arphilla M Momin, jinmana talate on·angengon, ia program-ona re·bagipa Integrated Village Development Society (IVDS)-ni member-rangko rimchaksoaha.
Ia training program-ko a·bachengatani somoio dongpae jinmana aganprakanggipa gipin manderangara, IBDLP-ni DPM Venecia N Sangma, Ampati Piggery Mission-ni Nodal Officer Dr AK Marak aro gipinrang ong·a.
