Orem (US), Sep 11: Saksa conservative activist aro chadambe republic voter-rangko re·jomdilgipa,  President Donald Trump-na kam ka·gipa mande, Charlie Kirk-ko Budbar salo Utah college-ni tom·bimonganio slai goe so·otaha. Dos daka ine matnangako man·gipa mande police-ni jakon ong·achim ine official-rang aganaha.

“Ian an·chingni a·dokna namen dukni sal ong·a. Ian politics-ni bidingo so·otani ong·aha ine anga talatna skenga,” ine Utah-ni Governor Spencer Cox parakataha.

Authority-rang dos dakgipa mande, ba uni miksongani ba dos dakanirangko ua somoion ta·rake sandianiko dakjaha indiba ia so·otanira ru·uta bilsirangna United States-o sorkari-ko rikani bidingo namrorojaenggipa obostarangni gimin parakataha.

Charlie Kirk-ko so·otaniko dingtang dingtang political party-rang jegalaha indiba  iandakgipa obostarangko mikkangchi champengsoani cholrangko darangba aganna man·jaha.

Utah Valley University-oni social media-ona watatgipa video-rango Kirk-ni microphone ra·e “The American Comeback” aro “Prove Me Wrong” ine segipa noktop mikkango asonge jinmana agananirangko nikna man·aha.

Uandake uno Kirk-ko guli nangaha aro ua an·tangni jakrani jakchi gitokko rim·ataha aro uni gitokni jakasichipakoni an·chi bang·en joksolangaha.

Uano donggipa manderang jagok-jabrang ong·e chrik-a·boke katbildangtokaha. Ia video-rangko Utah Valley University campus-ni Sorensen Center-ni a·paloni ka·aha ine Associated Press parakataha.

Ia obosta ong·ani somoio Kirk uni nonprofit political organisation-ni ong·atgipa jera ra·anio jinmana parake aganatenga. Uko guli nangna skang ua jinmaoni mande saksani manderangko slai goani aro slai goanichi an·chi-pari nikani gimin sing·anina aganchakengachim.

“Re·anggipa bilsi 10-ni gisepo badita sak transgender American-rang manderangko slai goaha na·a ma·siama?” ine ua mandeni sing·on, bang·dugaaha ine Kirk aganchakaha.

“Re·anggipa bilsi 10-ni gisepo America-o badita sak slai-chi manderangko gogiparang donga na·a ma·siama?” ine ua mande sing·taiaha, aro unon bobil dakgiparangni slai goanirangko chanema changija ine Kirk sing·doaha.

Ua somoion, slai-ni gam·ako knana man·aha. Slai-ko gogipa mande chola rong simako gana aro adita chel·ao campus-ni nokking-oni uko goataha, aro una siani sasti-ko on·gen ine Cox manderangna ku·chake on·angaha.

Kirk-ni sianiko Trump social media-o parakataha, aro ua bilsi 31 ong·gipa, Turning Point USA minggipa chadamberangni dol-ko a·bachengdilgipa aro CEO ong·enggipa Kirk-ko mitele aganangaha.

“United States of America-o Charlie-na bate darangba chadamberangni gimin u·igipa aro ma·sichakgipa donga,” ine Trump uni  social media-o seataha.

Obosta ong·ani ja·mano Utah Valley University-oni manderangko watattokaha aro campus-ko chipe donaha, klas-rangko dontongataha. Campus-o dongkuenggipa chatro-chatrirangko police-rang re·bae rimangjana kingking tom·tom dongchina ge·etaha. Sipai dolrang ua jolo re·roroe Kirk-ko gogipa mandeni gimin sing·sandianirangko dakangaha.

Kirk-ni ia tom·aniko ong·atna am·ania university campus-o bang·a manderangan jegalanirangkoba dakahachim. Kirk-ko re·bana on·jachina university administrator-rangko beng·na ine online petition-ko a·bachengaton sak-1000 ong·na am·pile manderang soi ka·aha. Re·anggipa anti-o First Amendment rights-ko janape aro jakgitele agan-parakaniko dakna man·a ine university talataha.

Uandake re·anggipa antion, Kirk social media X-o uni re·baanina kajia-golmalrang ong·engani bidingo sing·doataha.

Kirk-ko goani ja·mano Democratic official-rang Trump baksa bakrime, an·tangtangni nisan-rangko atagrik ra·onaha aro president-ni parakatanirangko seataha, aro Kirk-ni Republican ka·rimskarang uko so·otaniko jegalaha.

“Charlie Kirk-ko so·otaniara mitchibegipa, namgijagipa aro jegalako man·na kragipa kam ong·a,” ine Democratic California Gov. Gavin Newsom, social media X-o gatataha.

“Charlie Kirk-ko so·otaniara angko ka·tong be·ata. Ia somoio anga uni jikgipa, aro chonchongipa bi·sa sakgni aro uni ripengrang baksa duk chakrimpaenga,” ine 2011-o Arizona a·jao goako man·gipa gitcham Democratic congresswoman Gabrielle Giffords aganaha.

Kirk-ko so·otanichi mongsonggipa party dolgnigni gisepo kajia-golmalrangko batroroatna ine miksonganio ong·ataha ine chanchichipenga.

Iana agreba, June jao Minnesota state lawmaker aro uni segipako uamangni noko so·oataha, Hamas-ko uamangni rim·gimin manderangko watchina Colorado-o re·jomaniko boma galdapaniko dakaha, aro April jao Pennsylvania-ni Hew toromko ja·rikgipa governor-ni nokko wa·al so·aha. Iarangoni namjabatgipara re·anggipa bilsio Trump-ni campaign-ni somoio uko goanian ong·a.

Utah-ni gitcham Congressman aro Republican Jason Chaffetz Budbar salo tom·anio bak ra·aha aro ua changsa slai-ni gam·aniko knaaha aro uni ja·mano Kirk-ni ga·akaniko nikaha ine Fox News Channel-o aganaha.

“Uko sepangonin goaha gita nikaha. Utah-an a·gilsako naljokbatgipa biaprang ong·ani gimin iano iandakgipa obostarangko knarongjachim,” ine Chaffetz aganaha. Unbaksana ia tom·anio police-rang adita sak dongachim aro Kirk-naba uamang dongtimachim indiba uko jokatna man·jaha ineba ua aganaha.

Turning Point-ko 2012 bilsio Chicago-o bilsi 18 ong·gipa Kirk aro tea party activist William Montgomery a·bachengataha aro uamang iako tax-rang aro sorkari-ni bidingo manderangni chanchianirangko dingtangatna ine miksonge dakdilaha. Uamang ta·rakede chu·sokaniko man·jaha.

Indiba Kirk-ni gisik nangachi aro krengdilanichi uamang ka·sine ka·sine dingtanganirangko nikaha. 2016 bilsio Trump-ni GOP-ko man·ani ja·mano Turning Point unbaksa bakrimaha aro uno election campaign-ni somoio Kirk, president-ni skanggipa depante Donald Trump Jr-na dangdike on·aha.

Ru·utgija somoirangni gisepon, Kirk-ko cable TV-o nikrongna a·bachengaha aro ua manderang baksa jera ra·anirangko aro president gitchamko mitelaniragko dakrongaha. Trump aro uni depanteba Turning Point-ni bakrimanirango agananirangko dakrongaha.

Na·simang iakoba nina man·gen: 

Na·simang iakoba poraina man·gen: Antarctica-ni skonggimin chi-rang aro India-ni wachikarini nangdimaniko researcher-rang sandie man·a

na·simang hubnetwork.in, oniko video-ko niangan baksa poraina man·gen.

Chingko ka·mao mesokgipa social mediarango jarikna man·gen:-

Twitter- twitter.com/nemediahub

Youtube channel- www.youtube.com/@NortheastMediaHub2020

Instagram- www.instagram.com/ne_media_hub

Download our app from playstore – Northeast Media Hub