Shillong, Jan 27: Shillong Pynthorumkhrah constituency-oni BJP dolna chakpagipa sak 50 na batpile, Sukrobar salo Congress dolo napetokaha.
NCP dolni candidate Predecessor Rumnong aro BJP mandal General Secretary Phillby Lyngdoh, iamangoni saksana chakpaenggiparangko Sukrobar salo, sakgni dilgiparang Congress Bhawan-ona re·dilangaha jeon Congress dolni padot PN Syiem, uamangko dolona dingtangmancha rimchaksoaniko dakangaha. Uandake, salni bako dolo napegiparang Pynthorumkhrah-oni Congress doloni susana am·enggipa candidate PN Syiem-na chakpaaniko on·angtokaha.
“Bilsi 25-rangna kingking MLA Pa Hek-ni nirokatani ning·o, a·jatango neng·nikanirangko bang·en chu·sokatna nangenga aro iako anga talatna nanggijan Pynthorumkhrah-ni manderang nambate ma·sia, maina, a·jatangna ua maming namdapatanirangko ra·baa dongja, chirangkoba chu·onga gita sale on·a dongja jeni a·selan manderang ianpakode Congress-na chakgrimna gita gisiksan ong·tokenga,” ine Pa Syiem parakataha.
Pa Hek-ni dilgipa ong·e nirokatani ning·o bang·a namroro-silroroaniko ra·bana gita bil gnanggipa a·jao mamingo namdapanian dongja ine janapatengon, Pa Predecessor Rumnong, MLA-oniko manderang bang·akon ka·dongchakanirang gnangchim indiba joltangni manderangna namgipa community hall-mangmangba dongja ine matnange agananangkuaha.
Re·baenggipa jani 27 tariko pu·onnasienggipana tarisamsoani gimin aganangskaengon, jeba dakgrikani pangnan altua ong·ja aro ianpakni eleksinba apsandaken ong·aigen ine aganenba, angaba saksa MDC ong·e politics-o ru·utbeen kamko ka·bagipa ong·e politics-ni kamko namen u·ia ine Pa Syiem agandapataha.
