Shillong, Oct 28: Mongolbar salo, Pynursla-o donggipa St Anthony’s Higher Secondary School-ni Silver Jubilee manianiko matchotatanio, Meghalaya a•dokni Chief Minister Conrad K Sangma-ba dongpae bak ra•angaha aro ia manianio, a•dokni Deputy Chief Minister Prestone Tynsong-ba dongpaaha.
Ia tom•bimonganio a•dokni Chief Minister, jinmana aganprakangengon, sorkarini ong•gijagipa skulrango higher secondary section-rangko kulina gita sorkarini dakchake on•na ja•ku de•chakatani gimin agan-talatanirangko on•angaha.
Bilsi 25-na namgipa lekka porako on•ahani gimin ia skulna an•tangni namgipa skaniko on•angengon, chatro chatrirangko bida budiosan ong•aigija, namgipa bewalrangko ong•atna gita kamko ka•engani gimin a•dokni Chief Minister, ia skulni dilgiparangko aro skigiparangko mittelpilangaha.
Meghalaya a•doko, mongsongbate Pynursla gita dakgipa sima jolrango skul nokrangko nambatate on•na sorkari kam ka•enga ine janapatengon, ia sorkari, darangkoba nichanggalgija, pilak biaprangon lekka porako nambate on•na kamko ka•enga ine Chief Minister parakataha.
Meghalaya a•doko lekka porani gadangko nambatatna gita dingtang dingtang kamrangchi on•gilahani gimin ua dingtangmancha Don Bosco-ni Salesian-rangkoba mittelpilangaha.
Meghalaya a•doko bilsini budget-oni gong crore 3,654 ong•gipa 15 percent-ko lekka porani kamrangna chamaha ine janapatengon, lekka porani kamrango a•dok sorkari, dingtang dingtang ra•bianirangko chagrongna nanga indiba rake kamko ka•anichi ia neng•nikanirangko chel•chakna man•enga ine Sangma aganaha.
Meghalaya a•doko dam 14,000-na baten skulrang donga aro ia skulrango sak 55,000-mangni gita skigiparang dongani gimin bilsio gong crore 1000-mangni gita tangka paisarangko private, adhoc aro deficit skulrangna koros ka•na nangenga ine janapatskaengon, iandake sorkari, lekka porani kamrangna tangka paisarangko champengani a•selsa dingtanganiko ra•bana man•enga ine Chief Minister aganaha.
Private skulrangna sorkarini dakchake on•ani sakkirangko janapatskaengon, seokgimin private skulrango higher secondary section-rangko kulina gita sorkari, gong lak 50-oni crore 1-ona kingking tangka paisarangko dakchake on•gen ine Chief Minister aganenba, ia scheme-ko man•chenggipa skulrangoni St Anthony’s HS School-ba damsa ong•gen ine ku•rachakaniko on•angaha.
An•tangni pagipa Purno A Sangma sagini gimin kan•dike aganangengon, sorkarini on•enggipa tangka paisarangko name jakkalrongani gimin ua dingtangmancha Catholic Mondoliko mittelpilangaha.
Ia tom•anio, a•dokni Deputy Chief Minister Prestone Tynsong-ba jinmana aganprakangengon, jolni chatro chatrirangna a•gilsakni seng•aniko on•anio bilsi 25 gapahani gimin St Anthony’s Higher Secondary School-na an•tangni namgipa skaniko on•angaha.
Ia skulko kulichengmiting somoirangni gimin gisik ra•atpilengon, 2000 bilsimango Pynursla jolo ia skulmangmangsan higher secondary section donggipa skul ong•achim ine Tynsong parakataha.
Na·simang iakoba nina man·gen:
Na·simang iakoba poraina man·gen: Boko chibimako moila ong•atengani a•sel chini jonturang gimaenga
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
