Shillong, Jun 9: Adita salrangna skang Sohra jolo, sogimin manggisiko man•gipa Raja Raghuvanshi-ko so•otanina police-rang, mande sakbriko rim•aha aro uni jikgipa Sonam, jean gimae dongengachim, uaba Uttar Pradesh a•doko an•tangko police-rangna bame on•eaha ine Sombar salo, Meghalaya a•dokni Deputy Chief Minister aro Home (Police) Minister Prestone Tynsong parakataha.
Madhya Pradesh a•doko donggipa Indore songjinmaoni bia ka•daldale re•bagipa Raja aro Sonam Raghuvanshi, May 23 tarikonin Sohra jolo gimaangaha indiba Raja-ni tong•sa sogimin manggisikode June-ni 2 tariko, Wei Sawdong Falls sambao donggipa a•silangoniko man•aha.
Raja-ni manggisiko man•ani ja•man Meghalaya Police, iani bidingo nambate am•sandina gita Special Investigation Team (SIT)-ko songaha aro uandaken, Uttar Pradesh aro Madhya Pradesh-ni police-rang baksa nangrime am•sandina a•bachengaha. UP aro MP police-rangni dakchakanichi Meghalaya Police, ja•mano UP a•doko donggipa Laddpur-oni bilsi 19 ong•gipa Akash Rajput, MP a•doko donggipa Indore songjinmaoni bilsi 22 ong•gipa Vishal Singh Chauhan, bilsi 21 ong•gipa Raj Singh Kushwaha aro Madhya Pradesh a•dokni Satna a•jao donggipa Basahari songoni bilsi 23 ong•gipa Anand Kushwaha-ko rim•na man•aha.
Ia manderangko rim•ani ja•man, so•otako man•gipa Raja-ni jikgipa Sonam-ba Uttar Pradesh a•dokni Ghazipur a•jao donggipa Nanganj Police Station-o an•tangko bame on•eaha aro uko da•o UP Police-rangni ning•on donkuenga.
Indake ong•engon, ia jiksesako sandianio rakbee kamrangko ka•ahani gimin a•dokni Deputy CM, Meghalaya Police, State Disaster Response Force (SDRF), National Disaster Response Force (NDRF), songni nokni dilgiparang, West Jaintia Hills Monitoring Club, dingtang dingtang dolrang aro media-ni manderangkoba mittelpilangaha.
Tynsong-ni aganani gitade, ia manderang, Raja-ko so•otani ja•man bakan Meghalaya-oni katangpilaha.
Ia manderang maikai Meghalaya a•dokona re•baaha aro a•dokoni re•angpilaha ine sing•anina aganchakaniko on•angengon, ia manderangko sing•sandina gita Meghalaya-ona rimbapilani ja•mansa uamang maikai songre songgabatachim, ukoba ma•sina man•gen ine Deputy CM parakataha.
Raja-ni jikgipa Sonam aro rim•a man•gipa manderangoni saksa Raj Singh Kushwaha-ni gisepo sriksrik mikchakgrikani dongani a•selsa uamang, Raja-ko so•ote galna miksonge, Meghalaya-ona re•baaha ine East Khasi Hills a•jani SP Vivek Syiem, an•tangni chanchichipaniko parakatskaaha.
“Pilak sakki aro chinrangoniko nion, uamangni gisepo Raja-ko so•ote galna chanchisamsoani donga ine nikna man•a. Ia manderangko sing•sandina Meghalaya-ona rimbaahaon, ia pilakkon tale ma•sina man•gen,” ine Syiem aganaha.
Dos dakgipa manderangko rim•na a•bachengkujaskal Sonam an•tangba dongnue dongaiaha aro dos dakgipa manderangko rim•ahaosa ua an•tangko police-rangna bame on•eahani gimin ian uamangni gisepo agangrikanirang donganiko mesokani ong•a ineba police official-rang aganaha.
Social media aro a•songni dingtang dingtang media-rango Meghalaya a•dokko ong•gija dake matnangna jotton ka•tokahani gimin jegalatengon, Meghalaya a•dokara tom•tomaniko namnikgipa manderangni songdongchakenggipa biapsa ong•a aro a•dokni police dolrang, India a•songo nambatsranggipa police dolba ong•a ine Tynsong parakataha.
“Meghalaya a•dokko ong•gija kamrangko ka•ronggipa biap ine agananiko a•dokni darang mandean namnikja aro chingni police dolan a•songo nambatsranggipa police dolba ong•a. Meghalaya a•doko bobil dake chakatgipa dolrangko chinga Army-rangni dakchakani grian warachakna man•aha aro ia apsan police dolrangan, ia case-ko salsnini gisepon pe•na man•aha,” ine Tynsong aganaha.
Meghalaya a•doko songdongenggipa Tribal jatrangni kosako social media-rango matnanggipa manderangko police-rang nie ra•aha aro iandakgipa manderangni kosako nangani kri ja•kurangko de•anggen ine SP parakataha.
Na·simang ia video-koba nina man·gen:
Na·simang iakoba poraina man·gen: Sonam an·tangko UP-o pakwata, sakgni manderangko rim·a
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Instagram- www.instagram.com/ne_media_hub
