Tura, June 4: Sonibar salo Meghalaya a·dokni Chief Minister Conrad K Sangma, Garo Hills-ni dingtang dingtang dolrangko Tura Circuit House-o grongenba, roster system aro reservation policy-ni bidingo agan-chanchirimdilangaha.
Chief Minister baksana ia tom·anio cabinet minister-rang, a·dokni chief secretary aro dingtang dingtang sorkari officer-rangba dongpaaha.
Ia tom·anio a·dokni Chief Minister, mongsongbate roster system-ni bidingo Garo Hills-ni dingtang dingtang dolrangna agan-talate on·angaha.
Ia tom·aniko ong·atani bidingo talataniko on·angengon, Garo Hills-ni dingtang dingtang dolrangna ua roster system-ni bidingo agan-talate on·aha aro talate on·ani ja·mano dingtang dingtang dolrangba an·tangtangni ma·sina nanganirangko sing·sandie ra·tokaha ine Chief Minister parakataha.
Ia tom·anio bak ra·gipa dolrangoni bang·batan da·o roster system-ni gimin ma·sitokahani gimin Shillong-ona re·angpilahaon roster system-ko ra·gatani bidingo cabinet chanchie nanga gita ja·kurangko de·angna man·gnok ineba Sangma, an·tangni ka·dongchakenganiko parakataha.
Chief Minister-ni parakatani gitade, ia tom·anio bak ra·gipa dolrangoni mitamrang, reservation policy-ni bidingo aro sorkarini songe on·gipa committee-rangni giminba sorkariko sing·e ra·tokaha aro uamangna ua, iarangni giminba agan-talate on·angaha.
Sorkarini songgipa expert committee-ni bidingo Garo Hills-ni NGO-rangna aro gipin dolrangna talate on·angengon, ian reservation policy-ko nipiltaina songgipa committee ong·ja indiba ning·tue am·sandianirangko dakenba, sorkarina ku·pattianiko on·china songgipa committee-sa ong·a ine Chief Minister talataniko on·angenba, ia committee-ni ku·pattianio pangchakesa sorkari ja·mano nangani kri ja·kurangko de·anggen ine parakataha.
