Nongpoh, Jan 25: Budbar pring 6:45 bajimango ML-05AB 9933 Mahindra Scorpio gari bolsa, NL-01N 6449 truck gari bolsa baksa, Ri Bhoi a•jani NH-06 Dulongnar jolo chatinggrike a•sel ong•aha aro ia a•sel ong•anio Scorpio garini sakbri manderang adita saknaanirangko man•na nangaha.
Ia a•selni bidingo police-rang am•sandie nion, Scorpio gariara Shillong-chipakni Guwahati-chipakna re•angengachim aro truck gariara Guwahati-chipakni Shillong-chipakna re•baskaengachim ine ma•sina man•aha.
Shillong-oni Guwahati-ona dilgni dake tarigipa ramako NHAI taridapengani gimin Umdihar-oni Dulongnar-onade garirangko rama dilsaon apsan watengachim indiba ia ramao truck-ko salgipa mande simsakgija salahani a•sel Scorpio gari baksa chatinggrike a•sel ong•na nangaha ine police official-rang kobor on•aha.
Saknaa man•gipa manderangko ja•mano Nongpoh-o donggipa Bethany Hospital-ona ambulance-o ra•angaha ineba kobor on•aha.
