Tura, Jan 25: Meghalaya a•doko Assembly election-ko ong•atna siengon, South West Garo Hills a•jao niam gri ra•bitgipa gong lak 10 tangkarangko mande sakbrioniko Election official-rang, rim•na man•aha ine a•dokni Chief Electoral Officer (CEO) FR Kharkongor parakataha.
Ia tangkarangko South West Garo Hills a•jani flying squad official-rang rim•aha ine janapatengon, da•o dipet Meghalaya a•doko iandake niam gri ra•bitgipa tangkarangko gimik gong lak 20-na baten rim•na man•aha ine CEO parakataha.
Kharkongor-ni parakatani gitade, South West Garo Hills a•jao gong lak 10.35 tangkarangko mande sakbrioniko rim•na man•aha aro ia manderang, ia tangkarangko ra•bitani bidingo maming lekkarangko sakkina mesokna man•jahachim.
Meghalaya Legislative Assembly election-ko re•baenggipa February jani 27 tariko ong•atengani gimin a•doko Model Code of Conduct (MCC)-ko ra•gatahachim aro MCC-ko ra•gatahani gimin maming sakki gride gong lak 50-na bate tangkarangko ra•bitna on•jaengachim.
