Williamnagar, May 8: Re•anggipa March jao, Garo Hills Autonomous District Council (GHADC) election-o gipin jatrangni bak ra•paaniko jegalengmiting somoio, so•sojengjeng ong•anirangna rim•a man•gipa pilak chadamberangkon watpilchina dabie Sukrobar salo, Williamnagar-ni dingtang dingtang dolrang, Rongrenggre Government Higher Secondary School kal•chakramo jinma tom•bimonganiko ong•ataha. Ia a•selni bidingo police-rangni rim•aniko dontongchina gitaba ia tom•bimonganio jinma dabiangtokaha.

Ia tom•bimonganio, NGCO, ADIL, Mother’s Union, Nokma-Sordarrang, NAD, GSMC, All India Garo Union aro uandakgipa dingtang dingtang dolrangko man•chape Garo Hills gimikonin manderang re•bae bak ra•angtokaha indiba ia tom•anio, Garo Students Union (GSU) Eastern Zone-de bak ra•angskajaha.

Ia tom•aniko, Garo Enlightenment Society (GES)-ni president Sillang Goera C Marak dilangaha aro ia tom•bimonganiona sokbagiparangko rimchaksoangengon, re•anggipa March jao Garo Hills-o so•sojengjeng ong•anina rim•a man•gipa dilgiparangko aro chadamberangko watpilchina dabina ia tom•aniko ong•ataha ine talate on•angaha. Ia tom•bimonganiko ong•atchina gita manderang an•tangtangan diditokahani giminsa dingtang dingtang dolrang nangrime ia tom•aniko ong•atahachim indiba bang•a manderangan ia tom•aniona re•bae bak ra•eskajaha ineba Marak, an•tangni suk ong•gijaniko parakataha.

Ia tom•bimonganio, Niksamso Garo Community Organisation (NGCO)-ni president Tengrak B Marak-ba jinmana aganprakangengon ia tom•aniona manderang bang•e sokbajahani gimin an•tangni suk ong•gijaniko parakatenba, Garo Hills-o so•sojengjeng ong•angani ja•man toromko dilgiparang, ja•delgimin manderang, dingtang dingtang dolni dilgiparang, district administration aro sorkari official-rang, Garo Hills-ni dingtang dingtang biaprango tom•tomanina tom•anirangko ong•ataha ine aganaha.

Garo Hills-o da•o tom•tomaniko man•piltaiahani gimin dilgiparangko aro chadamberangko rim•aniara kraani ong•jaenga ine janapatengon, rim•a man•gipa pilak manderangkon watpilchina aro mikkangchi rim•anirangko dontongchina gita NGCO-ni president, Chief Minister Conrad Sangma-chi dilenggipa Meghalaya sorkariko mol•molataha.

Ia tom•anio, Nangrimgimin A•chik Dol (NAD)-ni president David Ch Marak-ba aganprakengon, GHADC election-o susagiparangna Scheduled Tribe (ST) certificate-ko nangtelgipa ong•atna ku•cholsan dabiahani gimin aro ia kamko chu•sokgipa ong•atahani gimin Garo Hills-ni manderangko mittelpilangaha. Garo Hills-ni manderang jatsan ong•e kamko ka•ahani giminsa ia kam chu•sokgipa ong•aha ineba Marak aganaha.

Ia tom•anio, Achak Jang•kegre A•kingni Nokma Almen D Shira, Nokmarangni pal aganprakangskaengon, ia so•sojengjeng ong•anina rim•ako man•gipa chadamberangde dosgrirangsa ong•achim aro Muslim manderangonin ding•chaoatahani a•selsa Garo Hills-o so•sojengjeng ong•aha ine parakataha. Ia so•sojengjeng ong•anio dolgnionin dos donggenchimode, maini gimin Garorangonikosan rim•e, gipin dolchipaknikode rim•skajaenga ineba Shira sing•doataha.

Ia tom•anio, Garoland State Movement Committee (GSMC)-ni organizing secretary-ba aganprakengon, GHADC election-rango susagiparangna ST certificate-ko nangtelgipa ong•atchina indita bilsirangoni dabiengako chu•sokatchipjani a•selsa Garo Hills-o so•sojengjeng ong•angaha ine Chief Minister Conrad Sangma-chi dilenggipa sorkariko matnangataha.

Mikkangchiba dingtang dingtang dolni dilgiparangko aro chadamberangko rim•angkua ong•ode Garo Hills-o so•sojengjeng ong•piltaiani cholrang donga ine mikrakataniko on•angengon, so•sojengjeng ong•anirangko chel•chakna gita rim•a man•gipa manderangko ta•raken watna nanga ine GSMC-ni dilgipa, a•dok sorkario dabiangaha.

Ia tom•bimonganio dongpae jinmana aganprakanggipa gipin manderangara, ADIL-ni president, AIGU-ni dilgiparang, ja•delgimin manderang aro dingtang dingtang dolni dilgiparang ong•a.

Tom•a matchotani ja•man GES-ni president Sillang Goera C Marak, kobor ra•timgipa manderang baksa agangrikengon, mikkangchiba uamang rim•a man•gipa chadamberangko watpilchina dabiangkuna ia tom•anio tik ka•aha ine parakataha.

Ia a•selni bidingo rim•aniko dontongchina aro rim•a man•gipa manderangko ta•raken watpilchina ADIL-ni president Francis Marak-ba, sorkari aro district administration-ko didiataha.

Na·simang iakoba nina man·gen:

Na·simang iakoba poraina man·gen: M’laya-ni CM Conrad Sangma, ia bilsini SSA-ni football kal∙susaanirangko oprake on∙anga

na·simang hubnetwork.in, oniko video-ko niangan baksa poraina man·gen.

Chingko ka·mao mesokgipa social mediarango jarikna man·gen:-

Twitter- twitter.com/nemediahub

Youtube channel- www.youtube.com/@NortheastMediaHub2020

Instagram- www.instagram.com/ne_media_hub