Shillong, May 7: Meghalaya-ni Skotong Minister Conrad K. Sangma, Shillong Sports Association-ni ong∙atenggipa 2026 bilsini football kal∙susaanirangko Bristibar salo oprake on∙angaha aro uko ong∙atanina dakchakna ine lak ₹32 tangka-paisarangko on∙atenga ine parakataha.
Ia bilsini kal∙susaanirangko Shillong-ni SSA Ground-o Sports and Youth Affairs-ni Minister Wailadmiki Shylla, gitcham Sports Minister aro SSA-ni President Banteidor Lyngdoh, football official-rang, kal∙susagiparang aro bak ra∙enggipa club-rangni manderangni mikkango oprake on∙angaha.
Uandake, kal∙susaanirangko oprake aro SSA-ni nisanko songenba, football kal∙susaaniara Meghalaya a∙dokni ong∙baanio dingtangmancha donggipa bimung ong∙a inenba, a∙doko donggipa chadambe kal∙susagiparangna bang∙bata cholrangko ra∙bana nangenga ine Skotong Minister aganangaha.
“Chingni miksonganide rongtala – chinga Meghalaya-ko aro mongsongbate Shillong-ko India-o football-ni skotong ong∙atna skenga,” ine ua aganenba, kal∙chakani biaprangko tarianisan ong∙aija indiba kal∙susagiparangna, coach-rangna, kal∙susaanirangna aro songo-noko tournament-rangko ong∙atna cholrangkoba on∙na nanggen ine ua talatangaha.
Football kal∙susaani cholrang songrangona aro dingtang dingtang gittimrangona sokangenba, chubata gadangrango Meghalaya-ni palo kal∙susana chadamberangna cholrangko on∙ahaosa football-ni chong∙motgipa dal∙roroaniko nikna man∙gen ine skotong minister aganangaha.
Batanggimin bilsirango SSA-na dakchake on∙anirang bariroroaha – a∙bachenggipa bilsio lak ₹28 on∙aoni re∙anggipa bilsio lak ₹30-ona tang∙doaha aro 2026 bilsini kal∙susaanirangna Chief Minister’s Special Grant-oni lak ₹32-ko on∙enga ine Sangma parakatangaha. Unbaksana, kal∙susagiparangko bimchipgipa aro gisik nanggiparang ong∙chinaba didianiko on∙e, kal∙susaanirangko amanisan gamchataija indiba chakchikna man∙ani, rake kam ka∙ani aro ama cha∙aniko ra∙chakna man∙anirangkoba nanga ineba ua ku∙pattiangaha.
SSA-ni General Secretary Dipshon L. Nongbri, sorkariko uamangna dondikgija dakchake on∙anina mitelangaha aro re∙anggipa bilsio tangka-paisarangko on∙e dakchakanichi uamangni football league-ni bak bonga chu∙gimikkon ong∙atangna man∙aha ine aganangaha. Re∙anggipa bilsio man∙gipa tangka-paisarangoniko 95 percent ong∙nasipile kal∙susaanio bak ra∙gipa club-rangna boksis dake on∙angaha ineba ua aganangaha.
SSA-ko 1916 bilsio a∙bachengataha aro iani ning∙o Greater Shillong-oni ge 100 club-rangna baten bak ra∙enga aro uandake uan Shillong-o gitchambatgipa football association-rangoni ge∙saba ong∙a.
Tom∙bimongani somoio, Umkhrah chibima rikamjoljol SSA stadium-o chasong gitalni kri asongchakanirang aro uandakgiparangko rikna dakchakchina sorkariko didienba, ia project-na Detailed Project Report-ko tariman∙aha ine Nongbri aganangaha.
Ia bilsini skanggipa kal∙susaaniko Mawnianglah Youth Sports Association aro Sei La Sap FCC-ni gisepo ong∙atangaha.
Na·simang iakoba nina man·gen:
Na·simang iakoba poraina man·gen: EGH District Athletics Meet 2026-o Rongrenggre skul chegopa
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
