New Delhi, Jan 2: Ports, Shipping & Waterways-ni Union Minister Sarbananda Sonowal, Salgro Salaram a·dokrangni gam jin, nitoani aro namroro silroroaniko Congress dol ra·seke ra·aha indiba uarangko Prime Minister Narendra Modi, namdapatna kamko ka·skaaha ine aganaha. Parliament Session-ko ong·atanio President-ni agananina Lok Sabha-o Motion of Thanks-ko on·angengon, India-ni skanggipa Adivasi President, gnigipa Mahila President aro a·songoni dambatsranggipa President ong·ania, a·songni namgipa miksonganio ja·ku de·aniko mesoka, ian kraa bewalo, apsangrik ong·anio aro jagitelgipa songsalko rikna songreani ong·aniko mesokengani ong·a. Salgro Salaram joloni aro Assam-oni tribal saksa ong·e dangdike on·enganina, ua ia ‘Motion of Thanks’-ko on·angna rasong chabea ine Sonowal aganaha.
President-ni jinmana aganprakaniara mikkangchi a·songni namroro silroroanina tarisamsoanikosan agana ong·aija indiba Congress-ni chasongo tangka cha·ani, diksretani aro chu·sokatna man·gijanirangko aro Prime Minister Narendra Modi-ni chalaienggipa sorkarini a·songko dingtangatna kam ka·enganiko parakataniba ong·aha ineba ua agandapaha.
Unbaksana, Congress dolni chasongo uamangni sorkari ong·e chalaianio kam ka·na changjani gimin chu·sokani ba dingtanganiko man·jaha ong·ja indiba, Salgro Salaram a·dokni gam jin, nitoani aro namroro silroroaniko ra·sekdraani ong·a ine aganan baksa, a·songo pilak to bikotani, karkana, University, rama jal·lang aro internet connectivity-rangkoba jinma jingjengatani aro dabiani ja·mansa on·aha, uamang namen salgro salaram jolni manderangko namrengaha ineba Sonowal aganaha.
Congress dolni sorkari chalaiani bidingo gisik ra·atpilengon, salgro salaram jolo man·gipa gamrangko jakkale a·jani namroro silroroanina jakkaljaha, chadamberangko kamgri ong·ataha, rika cho·ani kamrangoba namdapa dongjaha aro pilakni gitan silrorodapani dongja aro bilsi 10-na Assam-o Congress MP ong·anggipaba a·doktangna maming namgniko ra·bajaha ine Sonowal janapataha.
Sarbananda Sonowal-ni aganani gitade, India a·songni tang·doanio salgro salaram a·dokrangkode man·chapatan dongjachim.
1962 bilsio dinggrikani gimin janapengon, ia somoirango Salgro Salaram jolrangko namen galchipaha jeni a·selan, niamgri drae election-ko ong·atna nangao ga·akaha, ru·uta bilsirangna jingjengataha, misilpilgipa niamrang jekai IMDT Act-ko ra·gataha aro rika cho·ani aro a·dokna naljokaniko on·anioba namen ja·manchakbeaha ine Sonowal gisik ra·atpilanniko dakangaha.
Ia andalgipa sal somoirangoniko dingtangatna Prime Minister Narendra Modi, 2014 bilsio kam ka·chakataha aro a·songni salgro salaram jolrango bang·a dingtanganiko ra·baskaaha ineba ua agandapaha.
PM Modi-ni dilanichi, salgro salaram jolni dingtanganiko man·ani gimin janapatskaengon, gitalgipa kajina gamani niamrangko aganangaha.
Indake salgro salaram jolrango highway, railway, airport, dolong aro digital connectivity-ko namdapatna sorkarini koros ka·ani gimin janapengon, ia project-rangko on·aniara manderangko anti bazaar baksa, school-rangona bi·sarangko, hospitalrangona sagiparangko aro salgro salaram a·dokrangko India a·songni gipin bakrang baksa nangrimatna kam ka·ani ong·a ine Sonowal janapataha.
Project-rang jekai, Bogibeel Bridge, Dhola-Sadiya Bridge, Sela Tunnel, rel ramarangko apalbatatani aro Vande Bharat service-rangchi manderangni janggi tanganiko tang·doatna cholko on·aha ineba ua agandapaha.
Salgro Salaram jolni dakbewalrangko aro a·songna on·gilaniko Congress dol namrenge ra·aha ine janapatengon, ia jolrangoni a·songna on·kanggipa matgrikrangko uamang manderangna parakjaha aro jatni dakbewal rikbewalrangkoba ra·chakna man·jaha indiba da·alo chalaienggipa sorkari, uamangni jatni dakbewal rikbewalrangko mingsing minggamatna dakchakaha aro UNESCO-o chapatako man·a gita aro GI Tag-ko man·aba kam ka·aha ine Sonowal aganaha.
Sorkariko chalaianiara, mikkim rasong aro nanganirangko on·ani ong·a, indiba indita ru·uta bilsirangnan Assam a·dokni cha bagano kam ka·e cha·enggiparangko vote man·a mang·mangsa Congress dol jakkalaha indiba uamangko mande ra·ani aro cholrangko on·ani dongjaha. Prime Minister Narendra Modi dilanichi, iandake jakkalanirang bon·aha aro da·alo ia cha bagano kam ka·e cha·enggiparango bank account-rang, bi·sarangko poraiatani school, nambata rama jal·lang, an·o donggipa ma·giparangna sanna bannaniko on·ani aro uamangni dakbewalrangko a·songoba niksenganiko on·a dakchakaha. Tribal jatrangoni a·songni jakgitelanina dakgrikanggipa matgrikrangkoba a·songo niksengna dakchakaha, songsalni namgnina on·enggipa scheme-rangko on·aha, lekka pora skianiko aro janggi tangani gadangko namdapatna dakchakanikoba sorkari on·enga ineba ua aganaha.
Indake President-ni agananio Congress dolni aro Modi-ni chalaienggipa sorkarini gisepo dingtanggrikaniko parakataha ineba ua janapataha.
Rika cho·ani aro janggi tangani gadangrango tang·doani gimin janapatengon, PM Modi-ni dilanichi ports, waterways aro logistic-rangkoba tang·doataha aro unbaksana, kamrangko nakatataha aro badingchiwale cha·na gita tangka paisani gita dakchakaniko on·aha ine aganaha.
Congress dolni chong·mot kamrangko manderang u·iahani gimin election-o uamangko manderangni jechakaniara, ka·o nangani gimin ong·jawa indiba uamangni kamko cha·tote nikani giminsa ong·gen aro iandake cha·minokgipa party-onade maming saloba manderang an·pilangjawa ine Sonowal aganaha.
