Imphal, Dec 10: India a•songni salgro salaram a•dokrangba gipin a•dokrang gita re•mikkangna nangenga ong•ode ia a•dokrango Armed Forces (Special Powers) Act (AFSPA) gita dakgipa niamrangna biap dongjawaha ine Sukrobar salo Meghalaya a•dokni Chief Minister aro National People’s Party (NPP)-ni national president Conrad K Sangma parakataha.

Re•anggipa December-ni 4 tariko Nagaland a•dokni Mon a•jao dos gri manderangko sipai dolrangni skatang so•ote galani gimin salgro salaram a•dokrangoniko AFSPA-ko ra•galpilchina gita ma•mong sorkario dabie, Sangma ia kattarangko aganaha.

AFSPA-ko ra•gatanichi sipai dolrang, salgro salaram a•dokrango skatang bilrangko jakkalna man•enga ine talatangengon, iandake bilrangko jakkalaniara obostarangko namdapatani pal batesa namjabataona ra•angenga ine Sangma, AFSPA-ko chu•gimik ra•galpilchina gita ma•mong sorkariko didiataha.