Shillong, Nov 3: Khasi aro Jaintia Hills a·jani dingtang dingtang NGO-rangni nangrimgimin ‘Save Hynniewtrep Mission’ -ko dilenggiparang, ma·mongo aroba a·doko uamangni dabienggiparangko gong·raken chu·sokate on·china gita didiange Bristibar salo a·dokni dakchakgipa skotong minister Pa Prestone Tynsong-ko grongangtokaha.
HYC, HANM, JSM aro Confederation of Ri Bhoi People-ni dilgiparang, minister-ko grangangani somoio, Meghalaya a·doko Inner Line Permit (ILP) ko ra·gatchina, Constitution-ni Eight Schedule-o Khasi ku·sikko chapatchina, ru·uta bilsirangoni dabienggipa Harijan Colony-ni mamlako matchotate on·china aro sima-arini kajia-golmalni bidingo batanggimin somoio Meghalaya aro Assam a·dok damgnini gisepo skanggipa gadango MoU-na soi ka·grikanggipako aro reservation policy-ko nipiltaichina gita gisik ra·atangaha.
ILP-ni bidingo Save Hynniewtrep Mission-ni dilgipa Robertjune Kharjahrin-ni agananaganio, ma·mongni home minister Pa Amit Shah ru·utgijan Shillong songjinmaona re·batainasiengani gimin ru·uta bilsirangoni a·jani manderangni dabienggipa mamlako minister baksa agan-golpogrikangtaigen ine dakchakgipa skotong minister uamangna u·iataha ine talataha.
Harijan Colony-ni mamlako janapangskaengon, Kharjahrin, Harijan colony-o dongenggipa manderangko apjitatna sorkarini biap sandie ra·bagiminko ra·chakatchina aro Them Mawlong biapko bakbakan wate on·ani giminba sorkarina agan-ku·pattiaha ine janapatan baksa, sorkari quarter-ko rikatanirang matchotkujana kingking songjinmani je biaprangoba dikdiksana dongchengchina gita ua nokdangrangna nok pararangko on·ani giminba uamang sorkarina agan-ku·pattiangjolaha ineba parakataha.
Reservation policy-ni gimin aganengon, a·dokni reservation policy-ko gital dakpiltaichina aro nipiltaichina gita NGO-rang sorkario dabiaha aro iako sorkari dangtapna nangnikja ine nikode A·chikrangna dingtang a·dokko on·china aro Khasi-rangna dingtang a·dokko on·china ine Kharjahrin parakataha.
Sima-arini mamlao, Kharjahrin-ni aganangani gitade, ia gimikan Assam sorkarini regional committee-rangko songna somoiko ru·utatani a·sel ong·aha aro da·o ia mamlako namgrikatanide eleksinrangna skang matchotatna man·jawa gita nika ine parakataha.
