Shillong, May 7: Shillong Lok Sabha by-election-o susana gita Khasi Authors Society (KAS)-ni president aro North Eastern Hill University (NEHU) Professor (Dr) DRL Nonglait-ko National People’s Party (NPP)-ni candidate-na seokaha.
Re•anggipa February-ni 19 tariko, Shillong-ni Lok Sabha MP Ricky Andrew J Syngkon-ni tanggitik saaniko man•e siangani ja•man da•o Shillong Parliamentary Constituency-ni by-election-ko ong•atna nangengachim ine nikna man•a.
Indake ong•engon, ia by-election-o susana gita Khasi ku•sikko Eighth Schedule-o napatna krengdilenggipa aro NEHU-ni skigipa Dr Nonglait-ko NPP, candidate-na seokaha.
Dr Nonglait, NEHU-ni ning•o donggipa Khasi Department-ni Professor aro College Development Council-ni Director ong•e kamko ka•gipa ong•a aro ru•uta bilsirangonin sea jotanio gisik nanggipa mande ong•e da•o Khasi ku•sikko Eighth Schedule-o napatchina dabidilenggiparangoni saksaba ong•a.
Ua an•tangni B.Com aro B.A. (Hons)-ko NEHU-o matchotani ja•man apsan university-on Khasi ku•sikko M.A-ba dakaha. Ja•mano Dr Nonglait, Madras University-o Christian Studies-koba M.A dake, NEHU-o M.Phil aro Khasi-o Ph.D degree-koba man•aha.
Dingtang dingtang gadangrango poraiani ja•man Dr Nonglait, dingtang dingtang college aro university-rango kamrangko ka•angaha.
1999 bilsioni 2000 bilsiona ua Mawsynram Border Area College-ni Principal ong•e kam ka•aha aro uni ja•man 2000 bilsioni 2006 bilsiona Mawkyrwat-o donggipa Sngap Syiem College-o kam ka•eskaaha.
2006 bilsioni 2012 bilsiona ua, NEHU-o Khasi Department-ni Reader ong•e kam ka•aha aro uni ja•man 2012 bilsio Professor-ona ra•doatako man•e ua da•alonan ia kamko ka•engkua.
Meghalaya sorkarini songe on•gipa dingtang dingtang committee-rangoba Dr Nonglait, bak ong•pae kamko ka•aha aro uandaken 2008 aro 2010 bilsini gisepo ua State Literary Award-na saksa examiner dakeba kamko ka•aha. Khasi ku•sikko Eighth Schedule-o napatchina dabianio ua Task Force Committee-niba membor ong•aha.
Dr Nonglait, saksa sea jotanio gisik nanggipa mande ong•e, English-chi ki•tap kinggittam aro Khasi-chi ki•tap kingbrikoba seaha.
Sea jotaniosan ong•aigija Dr Nonglait, jatni dingtang dingtang kamrangoba bak ra•ronggipa ong•a aro uandaken 2007 bilsioni 2010 bilsiona ua Society of Khasi Studies-ni secretary ong•e dangdike on•aha aro 2010 bilsioni 2022 bilsiona kingking Tribal Literary Forum of India-ni secretary ong•eba kamko ka•aha.
Uni jatna aro a•songna ka•sae dangdike on•ako nike ia Shillong Lok Sabha by-election-na NPP, Dr Nonglait-ko party candidate dake seokaha.
Na·simang iakoba nina man·gen:
Na·simang iakoba poraina man·gen: Sherman Ali Ahmed-ni TMC-o nape election-o cheanichi party-na Assam-o pangchakaniko on∙a
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
