Shillong, Dec 4: Meghalaya a•doko Information & Technology (IT)-ni kamrangko bilakbatatna miksonganio a•dok sorkari, New Shillong-ni Mawdiangdiang-o a•dokni gnigipa IT Park-ko kulina gong crore 115-ko chamataha aro IT Park-ko re•baenggipa 2023 bilsini January ja dipet rikna a•bachenggnok.

Sonibar salo, [24]7.ai company-ni gital kuligipa BPO facility-ko IT Park-o nokdonggae on•angani somoio iako a•dokni Chief Minister Conrad K Sangma, jinmana parakataha.

Ia gnigipa IT Park-ko acre 40-mang ong•gipa biapo rikgen ineba ua parakataha.

Ia IT Park-ni sambao gital Secretariat-ko rikna sorkari miksongenga ineba Chief Minister, Hub News-na parakataha.

“Ia IT Park-ni janggilchipakan gital Secretariat-ko rikna miksongenga aro ia biapon gital quarter-rangkoba rikgnok. Chinga IT Park-ni mitam bakrangko Secretariat-na ra•aha indiba acre 40-mangni gita a•arangde dongkuengani gimin IT Park-na namen chu•ongaigen,” ine Sangma aganaha.