Shillong, June 8: Skanggipa State Women’s Conference ba a•dokni me•chikrangni tom•bimonganiko Budbar salo, Shillong songjinmani State Convention Centre-o ong•atangaha aro ia tom•bimonganiko Meghalaya a•dokni Chief Minister Conrad K Sangma, do•ga oe on•angaha.
Ia tom•bimonganio a•dokni Social Welfare Minister Kyrmen Shylla, Chief Secretary Rebecca Suchiang, Principal Secretary PS Kumar aro Meghalaya State Women’s Commission (MSCW)-ni Chairperson Phidalia Toi-ba dongpae bak ra•angaha.
Ia tom•bimonganio a•dokni Chief Minister, jinmana aganprakengon, ia conference ba tom•bimonganiara ru•utbea somoirangni ja•man a•doko ong•atenggipa tom•bimonganirangoni dal•batsranggipa tom•bimonganirangonisa ge•sa ong•enga ine parakangaha.
Ia tom•bimonganio bang•bea me•chikrang bakko ra•engani gimin aro ia tom•bimonganiko a•dok gimiko donggipa dam 46 block-rangoni sak lakgnimangni gita me•chikrang internet-rango nisoengani gimin ian me•chikrangni kamtango on•kanganiko mesokani ong•enga ineba Chief Minister aganaha.
Me•chik aro songsalni dingtang dingtang neng•nikanirangko namatnasan ong•aigija me•chik ong•aniko me•chikrang apsan manina man•na gita MSCW baksa tom•e chanchirimani ja•man ia me•chikrangni tom•bimonganiko ong•atna tik ka•aha ineba Chief Minister parakataha.
Dingtang dingtang dolrangko apsan ong•atanio women’s commission-ara mongsonggipa kamko ka•gipa ong•ani gimin ia Women’s Conference-ko bilsiantian ong•atangna gita tik ka•aha ineba Chief Minister parakataha.
Ia tom•anio ua Early Childhood Development Mission aro gital dake taritaigimin 181 Helpline-koba a•bachengate on•angjolaha.
Iana skang, India sorkarini Union Women & Child Development Minister Smriti Zubin Irani, internet gita jinmana aganprakatengon, me•chikrangni aro bi•sarangni namgnina iandakgipa tom•bimonganirangko ong•atenga ine a•dok sorkarini kamna an•tangni kusi ong•aniko parakataha.
Meghalaya sorkarini chu•sokatgipa kamrangara gipin a•dokrangna aro India sorkarina dakmesokani ong•china ineba Irani aganaha.
