Tura, Aug 29: A.B. Krima No. IV-ni ning·o donggipa A·chik Welfare Society (AWS), uni Civil Service Coaching & Training Center-ko da·asalni bako District Auditorium, Tura-o oprake on·angaha. A·dokni Skotong Minister, Conrad K. Sangma ianona mongsonggipa sokgipa ong·e re·baaha aro uni jakchin center-ko oprake on·aniko dakangaha.
Meghalaya Legislative Assembly-ni speaker Thomas A Sangma-ba dingtangmancha okamatako man·e re·baaha aro unbaksana West Garo Hills-ni Deputy Commissioner, Vibhor Aggarwal aro Garo Hills Autonomous District Council-ni Chief Executive Member Albinush R. Marak aro uamang baksana bang·a dingtang dingtang dilgiparangba re·bae ia tom·anio bak ra·angaha.
Uandake, Krima No. IV-ni President Jullince Barnard K. Marak-ni jakchi Isolo bi·e ia programme-ko a·bachengataha.
Ia centre-ko oprake on·aniara namen katchabegipa aro gisik ra·na kragipa ong·a, maina chadamberangan Meghalaya a·dokni dal·batgipa gam ong·a ine Skotong Minister jinmana parakataha. A·doko songdonggipa chu·gimikoni 50%mangni gita bilsi 20-ni ning·ao ong·giparang ong·a, uandake uamangko namgipa ramako re·atna skina aro tarisona nanga ine ua aganangaha.
Civil service porikkarango chu·sokanirangara nokdangni ba janggi tangani a·sel ong·ja indiba bebera·ani, krenge kam ka·ani aro bimchipani a·selsa ong·a ine skotong minister chatro-chatrirangko an·tangtango ka·dongchina didiaha. Una agreba, porikkana tarisamsoanio ong·gipa dakbewalrangko aro scientific cholrangko ra·e ja·rikna nanga inenba an·tangni poraimiting salrango ja·rikgipa ranta ka·anirangko janapaha.
Uandake porikkana tarisamsogiparang chu·sokaniko man·nasan krengna nangaija indiba miksonganiko man·ahaon jattang-a·doktangko gualgija una dangdike on·pilchina ine ku·pattiaha. “Na·simang maina ianona re·baaha, maina iako baseaha gisik ra·bo aro mamung saloba an·tangni manderangko gualnabe,” ine ua aganangaha.
Ia tom·bimonganio, AWS memoranda ge·gnirangko skotong minister-na on·aha. Skanggipara coaching center-ko chalaianio nanggipa bosturang aro biaprang jekai klasroomrang, library-rang, aro poraiani ki·taprang aro uandakgiparang. Gnigipa-o, chadamberangni gisepo pekgipa bosturangko jakkalanirangko namatna Tura-o rehabilitation center-ko a·bachengatani bidingo janapaha.
Sorkari uni DREAM project-ni (Drug Rehabilitation, Elimination and Awareness Mission) ning·o a·dokni dingtang dingtang biaprango rehabilitation ba namatpilani cholrangko on·na inenba kror 15 tangkarangko chammaha ine skotong minister ku·chakangaha.
Uandake Social Welfare Department AWS baksa bakrime jasa ba jagnini gisepo Garo Hills-o rehabilitation centre-ko a·bachengatgen ine ua aganangaha.
Da·o sak-100na baten chatro-chatrorang ia coaching program-na galatengaha. Dilgiparang aro songdonggiparangni dakchakanichi aro Isol-ni dilanichi mikkangchini dilgiparangko tarisamsona aro poraiani gadangrangko namdapatna, an·tangtangko dal·roroatna, aro manderangna dangdike on·na ia centre chu·sokgipa ong·gen iako a·bachengatgiparang ka·donge aganangaha.
Uandake Thomas A. Sangma-ba AWS-ko uamangni kamrangna mitele aganangaha aro nadobaenggipa chadamberangna ramako mesokna aro namedake skina nangchongmotani gimin agana baksana, uamangni changa-sapaniko namdapatna nanga aro niksamsoanirangko chu·sokatna dilaniko on·na nanga ine ua talatangaha.
“Porikka sea changantian cha·tote niani aro chu·sokgijani changantian skiani ong·a, aro jotton ka·a changantian chu·sokaniona sepangbatata,” ine ua chatro-chatrirangna gisik ra·ataniko on·aha.
Vibhor Aggarwal, IAS-ba AWS-ni ja·ku de·anirangko mitelaha aro chatro-chatrirangko mikrake aro an·tangtangni miksonganirangko chu·sokatna bimchipe dongchina didiangaha. Ua an·tangni poraie krengmiting salrangko gisik ra·atpile, UPSC porikka-na uni bilsi gittamna tarisamsoanian uni u·i-ma·sianiko namdapatasan ong·aijaha indiba uni mande ong·anioba chu·gimik namdapaniko on·aha ine aganaha.
Bon·kame, AWSCSCTC Committee-ni Dr. Sanggra A Sangma mitelpilani kattarangko aganangaha aro Hawakhana Baptist Church, Nokgipako mitelna bi·aniko dile program-ko matchotataha.
Na·simang iakoba nina man·gen:
Na·simang iakoba poraina man·gen: Assam-o mande saksa chi-o sripe sia
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
Download our app from playstore – Northeast Media Hub
