Tura, Jan 2: A·chikrangoni Indian Police Service (IPS) officer-na nominate ka·ako man·chenggipa Skylance G Momin sagi, police-ni kamrangosan ong·aigija, songsalna aro jatnaba bang·en on·gilangaha aro da·alo an·ching uni janggi tangani aro kamrangko kan·dike niatpile nina.
Bilsi 82 ong·e janggi tanganggipa Skylance G Momin, 1943 bilsini February 10 tariko Tura-o, Jenden Chambugong Marak sagi aro Nellie Garrey Momin sagini nokdango, gittamgipa de ong·e atchiaha. Ua Mission Girls’ School aro Practicing School-o poraichengani ja·man, middle, high aro class XI-koba Government High School-o poraie matchotaha.
Ja·mano ua Tura Night College-o poraie graduate ong·aha.
Graduate ong·ani ja·man Momin sagi, Don Bosco High School-o skigipani kamko ka·chengaha aro ja·mano, Garo Hills District Council-ni Taxation Branch-o kamko ka·e, Meghalaya sorkarini Medical department-o D.E.E aro Information Officer (Family Planning) ong·eba kamko ka·aha.
Iani ja·man Momin sagi, dingtangmancha police-ni kamko ka·na gita an·tangko on·kangaha aro uandaken ua bilsi 30-mang ong·na sipile police-ni dingtang dingtang gadangrango dangdike on·angaha.
Police-ni kamko ka·anio ua, Tura aro Williamnagar-o Deputy Superintendent of Police (DSP), Assistant Commandant, Superintendent of Police (SP), dingtang dingtang Meghalaya Police (MLP) Battalion-ni Commandant, Deputy Inspector General (DIG) of Police aro bon·kamao Inspector General of Police (IGP) ong·e, 2004 bilsio kamoni neng·takaha.
Momin sagini police officer ong·e kamko ka·anio, niam retirangko aro tom·tomaniko rakkina gita rakbee kamko ka·dilaha aro uni iandake kamko ka·dilanichi, Garo Hills-o bobil dake chakatgipa A·chik Liberation Matgrik Army (ALMA) dolkoba tom·tomaniona rimbana man·aha.
Sorkarini kamrangosan ong·aigija Momin sagi, A·chik songsal aro jatnaba bang·en on·gilangaha aro uni kam ka·dilanichi Garo Hills-o Nokmarangko mangrakbatatna gita Nokma Council-koba ua songdile on·aha. Uni iandake a·songna aro jatna kamrangko ka·ahani gimin Momin sagina, People’s Grassroots Democracy Advisory Council, dingtangmancha Meghalaya Award-ko on·aha.
Nokma Council-ni padot ong·e kamko ka·dilanio Momin sagi, Garo Hills-ni dam 19 songrango Nokma Kacharirangkoba rike on·na man·aha.
Nokmarangko chalaianiosan ong·aigija Momin sagi, Garo Hills-o bilsianti ong·atrongenggipa 100 Drums Wangala manianiko a·bachengatanioba saksa mongsonggipa membor ong·aha aro chadamberangni kal·susaaniko namdapatna gita dingtangmancha Tura Sports Association-niba general secretary ong·e kamko ka·aha.
Momin sagi, an·tangni jora ripengna Christabell N Sangma sagiko seokaha aro ua an·tangni jik-dedrang-su·drangrangnaba somoiko on·e, pangnan ka·sae nirok sandiaha. Uni jikgipa Christabell N Sangma-ko Silkigre songni Nokma songani ja·man Momin sagi, A·chikrangni niam retirangko aro Nokmarangni bilko mangrakbatatna gita pangnan an·tangko on·kange kamko ka·aha.
2022 bilsini a·bachengachibara ua sanna man·gijagipa sabisi sakanchiko man·aha indiba uni kim·kime Isolo bebera·anichi, ua ia saknaanikoba chakna man·aha. Momin sagi, saksa bamgipa mande ong·e aro Isolo bebera·gipa ong·e, pangnan sakgipinrangko, ‘Salgio grongtaigen’ ine salam ka·rongaha aro ua saoni nampilna gita man·jae, 2026 bilsini January 1 tarik pringo, tom·tombee a·gilsakko watangaha.
Momin sagina Sukrobar salo bon·kame mande ra·pilskaaniko dakenba, uni manggisiko gope galaha aro una bon·kame mande ra·pilskaaniko dakanio, Meghalaya a·dokni Chief Minister Conrad K Sangma aro dingtang dingtang dilgiparangba dongpaaha.
Na·simang iakoba nina man·gen:
Na·simang iakoba poraina man·gen: Kam ka•giparangni man•gnirangko jegalenggipa cha baganni nokgiparangna sorkarini dakchakaniko ra•galnaba gnang CM Himanta Biswa Sarma
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/ne_media_hub
