New Delhi, Dec 30: Sabisirangni giproroengmiting somoio a•songo songdongenggipa mande sakantini naljokanina, sorkari office-rangko lekka gri chalaina man•na gita cholrangko sandichina a•songni President Ram Nath Kovind, Budbar salo didiataha.
Sorkari office-rango lekkarangko jakkalgija gital kolrangko jakkalania samtangtango ong•telaigiparangnaba namgni ong•gen ine President aganaha.
Videoconference gita ‘Digital India Awards 2020’-ko on•angani ja•man jinmana aganprakatengon, “A•songni diltubatsranggipa biaprangoba songsalni gita dingtanganiko ra•bana an•ching gital chasongni kolrangko aro ICT-chi chalaienggipa kolrangko jakkalna nangenga,” ine Kovind parakataha.
Digital device ba gital chasongni kolrangko jakkalani namgnirangko a•songo songdongenggipa bang•a manderangan man•kujaenga ine janapatengon, dingtang dingtang cholrangchi iandakgipa kolrangni jakkaltoaniko uandakgipa manderangonaba sokatna nangenga ine President aganaha.
“Ia ja•kuko de•anichisa an•chingni gital kolrangko jakkaltogipa ong•atna man•gen,” ine ua aganaha.
U•ianiko on•anian bil ine talatangengon, “Bang•bata manderangna an•tangtangni u•ianirangko suale on•aniara songsalo parakaniko bariatanisan ong•aigija a•songo songdongenggiparangko aro dingtang dingtang dolrangko mangrakbatatani gitaba ong•a. Iani giminsa sorkari, manderangna dingtang dingtang data set-rangko aro data resource-rangko on•na a•bachengaha,” ine President parakataha.
