Shillong, Nov 14: Samagra Shiksha Abhiyan (SSA) scheme-ni ning·o Meghalaya a·dokna ma·mong sorkarini chame on·atgipa gong kror 59 tangkarangchi SSA skigiparangna jagnini dormaharangko on·na gita Meghalaya sorkari parakataha.
Iako Education department-ni Secretary aro SEMAM-ni State Project Director Ambrose Ch Marak, Meghalaya SSA Schools Association (MSSASA)-ni dilgiparangna parakataha.
“2021-2022 bilsina chamgipa tangka paisarangoni skanggipa bako gong kror 59 tangkarangko re·anggipa November 10 tariko Education Ministry, Meghalaya a·dokna chamataha ine Marak, chingna aganaha. Ia tangkarangoniko skigiparangna June aro July jani dormaharangko on·chengna sorkari tik ka·aha,” ine MSSASA-ni president Aristotle C Rymbai, kobor ra·timgiparangna parakataha.
Meghalaya a·dokni SSA skulrango skigiparang jabongani dormaharangko man·tokkujaengani gimin sorkarini kosako jegale jingjengatanirangko daktokengahachim.
Indake ong·engon, skigiparangna bangki dongkuenggipa dormaharangko on·na man·na gita a·dokni Chief Minister Conrad K Sangma, ma·mong sorkariko bakan didiatgen ineba sorkari official-rang, MSSASA-ni dilgiparangna parakataha ine Rymbai aganaha.
Meghalaya a·dokni gimik sak 12,547 SSA skigiparangna japrakni dormaharangko on·na gita a·dok sorkari, komibeoba gong kror 26 tangkarangko nangenga ineba ua aganaha.
Skigiparangna jagnini dormaharangko on·chengna gita sorkarini tik ka·aniko ra·chakangengon, skigiparang June jaoni October jaona kingkingan dormaharangko man·tokkujaengani gimin ia jagnini dormaharangko on·aniara skigiparangni neng·nikanirangko aditade namatna dakchakani ong·gnok ine MSSASA-ni president parakataha.
Jagittamni dormaharangkoba ta·raken skigiparangna on·skachina gita ua a·dokni chief minister aro education minister-ko didiangskaaha.
