Shillong, Oct: Shillong songjinmani Sweeper’s Lane-o songdongenggiparangoni 20 percent-san Shillong Municipal Board (SMB)-o kam ka•giparang ong•aia aro bang•batan niam gri songdong a•chaenggiparangsa ong•a ine Mongolbar salo Mawlai-ni Congress MLA aro Opposition dolni Chief Whip PT Sawkmie parakatenba, ia biapo niam gri songdongenggipa manderangko sorkari baksa bakrimchina aro an•tangtangni biapko sorkarina wate on•china didiataha.Iani bidingo Hub News baksa agangrikengon, batanggimin sorkarirangoni darangba ia biapo niam gri songdongenggipa manderangko a•rikgalna man•kujaengachim indiba ia MDA sorkari, da•o ia biapo niam gri songdong a•chaenggipa manderangko a•rikgalna ja•ku de•chakataha ine Sawkmie mittelpile aganangaha.Ia biapo niam gri songdongenggipa manderangko sorkarini a•rikgalna ja•ku de•anio gipin biaprangoni dingtang dingtang dolrang champengna jotton ka•engoba, sorkarini manchigimin gitan ia biapo songdongenggipa manderangko a•rikgale ia biapko jako ra•china gitaba sorkariko didiangaha.

Ia biapo niam gri songdongenggipa manderangko sorkari baksa bakrimchina didiangengon, SMB-o kam ka•enggiparangna aro kam ka•gija ia biapo songdongenggipa pilaknan sorkari, dongchakani quarter-rangko on•enga ine Congress MLA, sorkariko mittelpilangaha.

Sweeper’s Colony-ko sorkarini jako ra•na manchienganiko Minorities Commission, National Commission for Minorities, Punjab sorkari aro dingtang dingtang Sikh dolrangni champengna jotton ka•engani gimin janapatengton, ian Meghalaya a•dok ning•ni kamsa ong•ani gimin uamangni iandake jak on•paaniara kraani ong•ja ine Sawkmie parakataha.

“Ia biapo songdongenggipa Harijan manderangni gipin biapni manderangna ong•gijako mesokaniara namen kragijani ong•enga maina ian SMB-o kam ka•giparangko a•rikgalnasa ja•kuko de•ani ong•engachim aro uamangna namnamgipa quarter-rangko on•esa ia biaponiko ong•katatengachim. Ian gipin a•dokni sorkarirango ong•genchimode an•ching iandakgipa on•anirangko man•jawachim,” ine Sawkmie talataniko on•angaha.

Ia biapo niam gri songdongenggipa manderangko sorkari drae a•rikgala ong•jaenga indiba dingtang dingtang cholrang baksa gipin biapona apjitatanisan ong•enga ineba Congress MLA talataniko on•angaha.