Tura, Nov 27: South West Garo Hills a·jani Mahendraganj Police Station-oni km 5-mang chel·ao donggipa Aragittim songo a·ningoni chimikko bikotna a·kolko cho·engmitingo maibakai a·a ning·achini wa·al kamdoaniko mija Robibar salo knasona ba social media-rango niksona gita man·aha, jekon a·ningoni gas ba to gnanggipa biapko cho·gakna nanga ine chanchichipenga.

Ia nikronggija obostani bidingo authority-rangni koborna u·iatani gitade, ma·mong sorkarini a·bachengatgipa scheme Jal Jeevan Mission (JJM)ni kamna PHE staff aro technician-rangni a·kolko cho·engmitingo somoio a·koloni wa·al chadoe kamchakataha aro ian mija November 27 tarikni attamchibara 3 ata bajimango ong·aha ine janapataha.

A·kol cho·gipa biaponi wa·al kamani koborko man·soa tapan Mahendraganj-ni Fire and Emergency Services department-ni wa·alko kimite galgiparang sokbae chi satdapani ja·man wa·alko kimite galna gita man·aha. Indake ong·oba, ua a·koloni da·omangba ka·spu dake ong·katengkua ine knasona gita man·enga.

Indake ong·engon, ia obostachi maming saknaako man·ani koborrangkode da·odipet man·soa dongkuja aro a·jani police-rang ua biapko nitimenga ine kobrrangko man·soan baksana, ia obosta ong·gipa biapo a·ningni to ba gas jokna nanga ine chanchichipenganiko sandiatna gita bang·gija salni gisepon Oil and Petroleum Ministry-ni expert-rang sokbatoknasienga ine koborko man·sodapaha.