Agartala, May 18: Central aro State Education Board-rangni tarienggipa Kokborok question paper-rangko Roman aro Bengali oikorrangchi tariatna man·na gita, niroke kamko ka·atchina Tripura assembly-ni warachakgipa TIPRA Motha, skotong minister Pa Manik Saha-ko Butbar salo mol·molangaha.
CBSE-ni porikkao, Kokborok question paper-ko oikor mingsachi tariani mamlao High Court-ona re·angchina gita TTADC administration-na agan-ku·pattiataha, maina songsalo manderangni ra·chakna man·gijagipa ku·sikko ra·gatdraaniko chinga maming dakeba ra·chakna man·jawa aro ia mamlao pilakan ku·cholsan ong·na gita nanggen ine TIPRA Motha-ni skotong dilgipa Pradyot Kishore Manikya Debbarma, Twitter-ko see parakataha.
Porikkao, chatrorang namnikatangko basee sena cholko man·na gita, question paper-ko Bengali aro Roman oikorrangchi tariatani mamlako gong·raken nirokatchina gita warachakgipa dolni dilgipa Animesh Debbarma-ba skotong minister-na chitti seatgipao janapataha.
Bengali ku·sikko agangipa sakgniko changale, sak 330 Kokborok postgraduate-rang Roman oikorchin sing·anina aganchakanirangko daktokaha ine Debbarma, seachi parakatan baksa, Tripura University-o Kokborok department-ko batanggimin 2015 bilsio a·bachengataoni intalan MA entrance test aro semester porikkarango oikor minggnichin question paper-rangko taribaenga ineba TIPRA Motha-ni dilgipa janapataha.
