Shillong, May 18: NEHU-ni Sports Authority of India (SAI)-o Dream Foundation baksana Assam Rifles Public School, BBFS Residential Academy, Indian Football Foundation aro Baichung Bhutia Football School (BBFS)-ni kuligipa football development centre ‘Dare to Dream Academy’-ko Bristibar salo, Meghalaya a·dokni Chief Minister Conrad K Sangma, a·bachengate on·angaha.
Ia football development centre-ko do·ga oe on·angani somoio a·dokni Chief Minister, jinmana aganprakangengon, salgro salaram jolo skanggipa residential football academy-na Meghalaya a·dokni skotong Shillong songjinmako seokahani gimin Dream Foundation aro Baichung Bhutia-ko mittelpilangenba, ian Meghalaya a·dokna mikkim rasongko ra·baanisan ong·aija indiba Meghalaya a·doko aro mongsongbate salgro salaram jol gimiko chadamberangni kal·susaanio namaniko mesokaniba ong·enga ine parakataha.
Batanggimin bilsirango, STAR Talent Identification program-chi Meghalaya sorkari, Meghalaya a·dok gimikni sak 5000-mangni gita kal·susaanio changgipa sapgipa bi·sarangko porikka ra·e nimanaha ineba Chief Minister parakataha.
2036 bilsini Olympics-ode Meghalaya a·dokni kal·susagipa chadamberangoniba a·songtangna medal-ko chee on·gnok ine an·tangni ka·dongchakenganiko parakatengon, iani giminsa kal·susaanio changgipa sapgipa chadamberangko sandie international gadango training-ko on·na gita STAR Talent Identification Program-ko sorkari a·bachengataha ine Sangma parakataha.
Ia academy-ko kulianiara chadamberangna robol kal·aniko namdapatna gita namgipa chol ong·gen ineba Chief Minister, an·tangni ka·dongchakenganiko parakataha.
Iana skang, Baichung Bhutia-ba jinmana aganprakangengon, BBFS Foundation program-chi robol kal·anio nambatgipako skie on·enga aro chadamberang bilsi 17-ona kingkingde a·songni je BBFS training centre-rangoba skie ra·na man·gen ine parakataha.
Da·o dipet ia centre-o salgro salaram jol gimikoni sak 50 pante bi·sarang skie ra·enga.
