Shillong, Sep 10: A·songo ku·cholsan ong·e tom·tomao janggi tanganian ma·mong sorkarini mongsonggipa miksongani ong·a ine Sonibar salo, Union Waterways Minister Sarbananda Sonowal parakataha.
Sonibar salo ua, Shillong songjinmani NEHU campus-o ong·atanggipa tom·anio bakko ra·e jinmana aganprakangengon, a·songo songdongenggipa pilak manderangan ku·cholsan ong·e janggi tangrimna aro kamrangko ka·rimna nanga ine Sonowal parakataha.
Ru·utbea bilsirangna Assam aro Meghalaya a·dokni simao meligrikna man·jaenggipa biaprangko namatna gita da·o gnigipa changna agangrikaniko a·bachengatenggipani bidingo ua ia kattarangko aganaha.
“India a·songko damsan ong·atna aro bilakgipa a·song ong·atna chinga kamrangko ka·enga. PM Modi-ni dilanichi iako chu·sokgipa ong·atna chinga kam ka·enga aro changsaode an·chingba a·gilsako bilakbatsranggipa a·songrangoni damsa ong·gen,” ine Sonowal aganaha.
