25.3 C
Tura
spot_img

Tribalrangni a•ona A•paloni napdrabaenggipako champengsoani minggni chanchie tik ka•soaniko KHADC  taria

Must read

Shillong, Oct 29: Meghalaya a•dokni Khasi Hills Autonomous District Council(KHADC) October 27 tarik mongolbal salo ma•mong aro a•dok sorkari-ko a•dokona napdrabenggiparangko champengsoani niamrangko tarichina minggni chanchie tik ka•soaniko dakaha.

A•doko tribal manderangko chel•chakna Inner Line Permit (ILP)-ko on•china ma•mong sorkarina minggni chanchie tik ka•giminko on•aha.

Inner Line Permit ian a•paloni manderang a•dokona napbaon sakkina nanggipa lekkarangko on•a, jeon gipin a•dokoni napbaon ua lekkako on•a nanga, Arunachal Pradesh, Nagaland aro Mizoram ia a•dokrangona napangon ua lekkarangko nangaha.

Batanggimin bilsini December jao salgro salaram a•dokni manderang Citizenship (Amendment) Bill, 2019-ni bidingo jingjengatani gimin manipur a•doko ILP-ko ra•dodapangna ma•mong sorkari tik ka•ahachim.

Ua somoirangon, Meghalaya a•dokba ILP-ko dabie Assembly-o chanchirime tik ka•engachim.

KHADC-ni minggipin tik ka•giminara a•dokna Meghalaya Safety and Security Act(MRSSA), 2016-ko on•china aro Governor soi ka•e a•paloni napdrabaenggipako champengna gita sorkariko mol•molaha.

Council-ko Sixth Schedule-o segatgimin niam-on pangchake, Executive, Legislative aro Judicial bilrangkoba on•achim aro uno man•chapgimin a•jarangara – East Khasi Hills, West Khasi Hills, South West Khasi Hills aro Ri Bhoi iarangan ong•achim.

Council-ni Autumn Session-ni skanggipa salon Chief Executive Member Pa Titosstarwell Chyne chanchiako ra•baaha.

ILP-ko on•ani a•doko songdonggipa manderangna naljokani aro chel•chakaniko on•gen ine Pa Chyne aganaha.

A•dok sorkari ILP-ni bidingo chanchie tik ka•e dongimin on•a bilsisa ong•pilengjok indiba da•onaba ma•mong sorkari ra•chakkujaenga ineba ua agandapaha.

A•dokona niamgri napdrabaenggiparangko champengna MRSSA-ko chu•soke dake on•aniko council nangnika ineba Pa Chyne kobor-na aganaha.

Ia bilsini March 19 tariko Assembly-ni tik ka•gimin MRSS(Amendment) Bill, 2020 da•onaba governor-on ja•donggae dongkuaienga ineba ua agandapaha.

Council-ni gittamgipa chanchie tik ka•e dongiminara Governor-ko Bill-o soi ka•china mol•molani ong•achim.

Translated by Salman A. Sangma

spot_img

More articles

spot_img
-->

Latest article