Shillong, Naitung 9: U Myntri Rangbah ka Jylla u Conrad K Sangma ha ka Sngi Balang ula ong, ba ka jingwanrah ia ki jingkylla ha ka pule puthi ka shim por hynrei ka jingseisoh mynta kala pawshai kdar, haba ka Meghalaya kala ioh ia ka rekod ba kala kiew sted tam ha ka jingkamai (Score) ha ka PGI ha ka Ri bad kala kiew kynsan sha ki ar tylli ki kyrdan.
Ka jingioh ka jylla ha ka Performance Grading Index 2025-26 kala kiew sha ka 525 na ka 448 ha u snem ba lah dep.
Da kane, ka Meghalaya kala kiew na ka ‘Akanshi III’ sha ka ‘Akanshi I’, da kaba don ryngkat lang ha kajuh ka kyrdan bad kiwei pat ki 13 tylli ki jylla, kynthup ia kiba bun kiba na ka thain shatei lammihngi.
“Nga sngewkmen bha ban pyntip sha phi baroh ba dang mynta ka sngi, ka jingai kyrdan ka PGI bad ki nombar ki bapher kiba la mih. Kumba phi tip, ha ki 3-4 snem kiba la leit, kala don ka jingshimkhia bad ka jingpyrshang thikna jong ka Sorkar Meghalaya bad ka Tnad pule puthi ban pynbha ia kane” ong u Sangma.
Ula ong ba ka jingkiew suki suki ha kine ki 4 snem kiba la dep ka pyni shai kdar ia ka jingwanrah ia ka jingkylla lyngba ki kam kiba iai neh.
“Ha u snem 2022, ka jingioh kamai ka long 401. Ha u snem 2023 ngi lah ioh kamai 417. Ha u snem 2024, ngi lah ioh 448. Hynrei mynta u snem na ka jingkamai kaba 448 ngi lah kynjoh syndon sha ka 525 ha u snem 2025-26 bad kane kadei syndon ka jingkiew kynsan kaba heh tam ha ka ri baroh kawei hapdeng ki jylla ki bapher bapher” ula ong.
“Mynshwa ngi lah don ha ka kyrdan Akanshi III, kaba dei ka kyrdan kaba hapoh eh. Kala don ruh ka Akanshi II bad Akanshi I. Kumta, ngi lah sngewkmen bha ba mynta ba ngi lah don lang ha kajuh ka kyrdan bad kiwei pat ki 13 tylli ki jylla ha ka kyrdan jong ka Akanshi I, ia kaba ngi lah kiew kynsan arshah ha ka kyrdan” la bynrap u Sangma.
U Myntri Rangbah ula ong, watla kane ka jingkiew ka long kaba kongsan bha, ka sorkar kan ym pat hun hynrei ka don ia ka thong ban poi syndon sha kliar duh jong ka kyrdan ‘Utkrisht’.
Ula banjur ba ka jingkylla ha ka pule puthi kam dei satia kaba lah ban wan urlong noh tang ha ka shi miet.
“Ngim pat sngewkmen, ngim pat sngewhun da ka jingshisha ba ngi lah don ha ka kyrdan Aakanshi I. Ngi kwah ban poi sha ka kyrdan Utkrisht, kaba dei ka kyrdan kaba ha khliehduh bad kadei kaei kaei kaba ngi da thrang. Hynrei kumba nga ong, baroh ki jingpyrshang kin shim por pat” ong u Sangma.
Ula ong, ba ka jylla kala iaid ha ka lynti kaba dei bad ka khmih lynti ba kan dang iohnong shuh shuh ha ki snem kiban dang wan.
“Ka jingkamai ka jong ngi mynta, kadei ba ngi lah don ha ka lynti kaba dei kaba ngi iaid. Ka mat ka long ba ka jingkamai ka jong ngi kala kiew da jan 70 point. Kane ka dang dei tang ka jingsdang. Ngi khmih lynti kan dang don shuh shuh ka jingkylla ha ka jingai kyrdan ha ki snem kiban sa wan” ula ong.
U Sangma ula pynpaw ruh ia ka jingsngewnguh ia ka Tnad Pule Puthi halor jong kane ka jingjop.
“Nga hap ban buh ha ka rekod ia ka jingtrei borbah da u Myntri ka Pule Puthi bad khamtam eh u Commissioner & Secretary ka Pule Puthi u Vijay Mantri bad baroh kawei ka kynhun ka jongu, kiba la trei borbah ban lah ban kynjoh sha katei ka thong” ula ong.
“Ngi don ia ka jingkyrmen ba ha ki snem kiban dang wan, ngi ngin sa lah ban kyntiew shuh shuh ia ka jingkamai kaba ngin ioh pdiang na ka PGI” la ong u Myntri Rangbah.
Pule ruh : Ieng skhem ka Sorkar u Conrad Sangma ban iada ia ki paid Khristan, ong u Bah Sniawbha
Peit ruh :
Wad ia ki khubor ba dang shu jia na man ki jaka kyndong ka thain Shatei Lam Mihngi ha hubnetwork.in, ka tyllong khubor online jong phi ban lap ia man ki khubor ba dang jia, ki jingring durkhih.
Bud ruh ia ki ha ka
Twitter – twitter.com/nemediahub
Youtube channel – www.youtube.com/@NortheastMediaHub2020
Instagram – www.instagram.com/ne_media_hub
Download ia ka app jong ngi na playstore – Northeast Media Hub
