Tura, June 29: Tura Challenge Inter Mahari Basketball Tournament-ni bon·kamgipa kal·susaanirangko Sonibar salo Tura-ni Don Bosco College basketball court-o kal·angaha. Me·chikrangni kal·anio Chada aro Mangsang maharirang susagrikaha aro me·asarangni susaanio Gabil aro Chambugong maharirang susagrikaha, aro doltangtangna chakrimna ine gapchippile manderang re·baaha.
Me·chikrangni bon·kamgipa susaanio, 66-40 goalrangko chipe Chada mahari chegipa ong·aha, aro me·chikrangoni Most Valuable Player-ko (MVP) Silnangchi Chada Marak man·aha.
Me·asarangni bon·kamgipa susaanio, Chambugong aro Gabil maharirang krenge kal·angaha, uandake kal·ani skanggipa aro gnigipa bako Gabil mahari dilaha. Chambugong maharani kal·giparang namen krenge nadoba·taiaha aro bon·kamao 89-75 goalrangko man·e Chambugongrang chegipa ong·aha. Me·asarangni susaanio, MVP-ko Bian Karik Ch Marak man·aha.
Ia sal-9na ong·atgipa tournament-ara Krimkro Socio Cultural Club New Tura-ni bilsi 25 ong·aniko manianiba ong·a. Kal·susaanirangko Krimkro Socio Cultural Club New Tura, District Sports Office, Tura aro District Basketball Associtaion (DBA) nangrime ong·ataha aro una Meghalaya-ni Skotong Minister Conrad K. Sangma dakchakaha.
Garo Hills-rangni dingtang dingtang Maharirangni gisepo meli-nangrimaniko ra·bana aro kal·susaanirangko dakanichi, manderangni, mongsongbate chadamberangni janggi tangani bewalko an·sengdapatna ine miksonge ia tournament-ko June 20 tariko a·bachengataha. Ia kal·susaanirango dol-10 me·chikrang aro dol-16 me·asarang bak ra·e skanggipa biapna susagrikangaha.
Bon·kamgipa kal·susaanirangko dakanio, Meghalaya-ni Education Minister, Rakkam A. Sangma mongsonggipa sokgipa ong·e re·baaha aro kal·susaanirangko dakani bidingo manderangna didianiko on·aha, aro kal·susagiparang, Krimkro Socio Cultural Club-ni President Walseng Ch Sangma, aro Don Bosco College-ni Principal, SDB, Fr. Januarius S. Sangma-ba uni agananirangko ra·chakaha.
Kal·susaanirang matchoto Adah Fedora D. Shira dingtangmancha git ring·aniko dakaha aro Weightlifting Association, Tura, an·tangtangni bilrangko mesokaniko dakangaha, aro una agreba, Laisve Dance Studio ga·subee chroke mesokangaha.
Na·simang ia video-koba nina man·gen:
Na·simang iakoba poraina man·gen: Salgro Salaram jolni mitam biaprango relgari re·rura·aniko ta·raken a·bachengpiltaiatgen
na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Instagram- www.instagram.com/ne_media_hub
