Tura, Nov 7: Batanggimin antisani gisepon Tura jillani ning·o donggipa dam 16 gittimrango dengue sabisiko man·aha ine kobor on·aha.
Koborko on·ani gitade, da·o dipet Health department-o dengue sabisi man·gipa sak 42 manderangko segataha aro ian Tura jillani ning·o donggipa dam 16 gittimrang baksana Tura jillani a·palo donggipa dambri songrangkoba man·chapenga.
West Garo Hills a·jao aro mongsongbate Tura jillao dengue sabisi man·gipa batrorobaengani gimin adita salrangna skangsan, West Garo Hills a·jani Deputy Commissioner Ram Singh, dingtang dingtang gittimni dilgiparang aro health official-rang baksa tom·aniko ong·atangaha aro dengue sabisini giproroaniko champengna gita samrangko satchina aro gittimtangtango sikkonge dongenggipa chirangko galchina didiataha.
Tura-ni bang·bata gittimrangon manderang wakrangko jile ia dengue sabisi aro Japanese Encephalitis (JE) sabisirangkoba ong·atengani gimin, dingtang dingtang gittimrango wak jilanirangko nirok sandichina git aua Tura Municipal Board (TMB)-koba ge·etangaha.
